Rhannu realiti bod yn rhiant ar gyfryngau cymdeithasol

Sharlaine Quick a'i theulu

Mae mwy o rieni yn troi at gyfryngau cymdeithasol er mwyn rhannu delweddau realistig o fywyd wrth fagu plant.

Er y pwysau cyson i ddangos y bywyd 'perffaith' ar-lein, mae Sharlaine Quick a Gwawr Job-Davies o'r farn bod angen bod "yn agored".

Dywedodd Ms Quick bod cyfryngau fel Instagram wedi galluogi iddi "greu cymuned ar-lein sy'n ymddiddori yn yr un pethe".

Mae ymchwiliad diweddar wedi darganfod bod bron i hanner rhieni yn credu bod y cyfryngau cymdeithasol yn gosod disgwyliadau anghyraeddadwy pan ddaw at fagu plant.

'Rhannu'r realiti'

Mae Sharlaine Quick o Sir Benfro wedi bod yn rhannu elfennau o'i bywyd ar ei chyfrif Instagram ers iddi gael ei dau fab rai blynyddoedd yn ôl.

Dywedodd bod Instagram yn gyfle i "rannu syniadau", ac mae bellach wedi "creu cymuned ar lein sy'n ymddiddori yn yr un pethe".

Yn ogystal â rhannu cynnwys hapus a phositif, mae Ms Quick wedi bod yn onest am y problemau mae'n wynebu fel rhiant, gan gynnwys trafferthion cysgu ei mab Ralffi.

• Diffyg Cymraeg ar gyfryngau cymdeithasol yn 'bryder'

Dywedodd Ms Quick ei bod hi'n "joio siarad gyda mamau eraill sydd ddim yn cysgu".

"Fi'n meddwl bod lot o bobl erbyn hyn yn rhannu'r realiti o motherhood, ac mae yn gwneud pawb i deimlo'n well."

Ralffi a Cooper - meibion Sharlaine Quick

Aeth ymlaen i ddweud bod y cyfrifon yma yn rhannu'r "ups and downs o fywyd, a fi'n siŵr dewch chi ar draws rywun sy'n mynd trwy rywbeth tebyg i chi".

Fe gafodd Ms Quick a'i gŵr Carwyn eu meibion drwy driniaeth IVF, ac mae'n dweud ei bod yn "teimlo'n gryf" bod angen rhannu hynny.

Dywedodd: "Dwi'n meddwl bod y stigma yn dod o beidio siarad yn gyhoeddus amdano fe, so oedd hwnna'n benderfyniad nes i'n go glou, sef 'mod i'n mynd i rannu gymaint ag o'n i'n teimlo'n hapus i 'neud fel bod pobl eraill yn teimlo fel nag y'n nhw ar eu pennau eu hunain."

'Y da, y drwg a phopeth rhwng hynny'

Fe wnaeth Gwawr Job-Davies a'i gwraig, Catrin, fabwysiadu gefeilliaid pum mlynedd yn ôl, ac maen nhw o'r farn ei bod hi'n bwysig i fod yn "agored" am eu teulu, a rhannu'r daith ar-lein.

Aeth ymlaen i sôn mai mabwysiadu yw'r "peth gorau i fi a Catrin ei wneud ond hefyd y peth anoddaf. Dwi eisiau gallu rhannu darlun realistig o beth yw mabwysiadu."

Mae Gwawr Job-Davies yn gobeithio bod ei chyfrif yn "helpu rhai sy'n mynd trwy rywbeth tebyg"

Fe gychwynnodd Ms Job-Davies ei chyfrif Instagram ar ôl sylwi cyn lleied o gynnwys Cymraeg oedd ar y pwnc.

Yn debyg i gyfrif Sharlaine Quick, wrth rannu ei phrofiad, dywedodd ei bod yn "cynnwys y da, y drwg a phopeth rhwng hynny".

"Mae o'n gyfle i gysylltu efo eraill - rhai mewn sefyllfa debyg i ni, ond hefyd pob math o bobl a theuluoedd gwahanol," meddai.

Dywedodd bod nifer o bobl wedi cysylltu â hi ers iddi gychwyn ei chyfrif.

Cyfryngau cymdeithasol yn achosi pryder

Er bod nifer o gyfrifon fel rhai Sharlaine a Gwawr yn rhannu y da a'r drwg o fywyd, mae'r duedd o rannu delweddau o fywyd "perffaith" yn achosi pryder ymysg rai rhieni newydd.

Mae ymchwiliad wedi darganfod bod bron i hanner rhieni yn credu bod cyfryngau cymdeithasol yn gosod disgwyliadau anghyraeddadwy pan ddaw at ddulliau magu plant.

Dywedodd Gwawr Job-Davies mai mabwysiadu yw'r "peth gorau i fi a Catrin ei wneud ond hefyd y peth anoddaf"

Dywedodd Ms Quick: "Fi'n trio bob tro fi'n gallu rhoi ochr arall y geiniog.

"Fi'n siarad tipyn ambyti os bod rhywbeth wedi mynd yn wrong yn y dydd neu'r math 'na o beth".

I Ms Job-Davies, mae'n gobeithio bod ei chyfrif yn "helpu rhai sy'n mynd trwy rywbeth tebyg".