Carcharu dyn am oes am lofruddio ei gyn-gariad

Bydd yn rhaid i Mathew Pickering dreulio isafswm o 17 mlynedd dan glo

Mae dyn wedi cael ei garcharu am oes am grogi a churo ei gyn-gariad i farwolaeth mewn tŷ yng Nghastell-nedd Port Talbot.

Mae Mathew Pickering, 49, wedi cael ei ddedfrydu i o leiaf 17 mlynedd a hanner o garchar am ladd Georgina Dowey, 46.

Roedd Pickering wedi cyfaddef dynladdiad ond wedi gwadu llofruddio Ms Dowey mewn tŷ yn Stryd Beaconsfield, Llangatwg ar 7 Mai 2023.

Ond cafwyd yn euog gan reithgor yn Llys y Goron Abertawe yr wythnos ddiwethaf.

• Dyn yn euog o lofruddio menyw 46 oed yn Llangatwg

Clywodd y llys fod corff Ms Dowey wedi cael ei ganfod bron i ddiwrnod wedi ei marwolaeth, gyda bag du dros ei phen a 32 o anafiadau unigol.

Yn ystod yr achos, clywodd Llys y Goron Abertawe fod Mr Pickering a Ms Dowey mewn perthynas dros gyfnodau, a bod gan y ddau broblemau gydag alcohol a chyffuriau.

Dywedodd yr erlynydd Michael Jones fod Ms Dowey wedi dioddef trais domestig mewn perthynas flaenorol.

Doedd dim trefn ar ei ffordd o fyw, meddai, gan ei gwneud "hyd yn oed yn fwy bregus".

Fe welodd y rheithgor luniau camera cylch cyfyng o siop gyfagos oedd yn dangos Mr Pickering yn gadael y tŷ i brynu nwyddau, gan gynnwys cannydd (bleach), wedi marwolaeth Ms Dowey.

Mewn datganiad dywedodd fod hynny er mwyn glanhau gwaed oddi ar y llawr.

Honnodd Pickering fod y ddau wedi cael ffrae a orffennodd gyda Ms Dowey wedi'i chrogi ar lawr yr ystafell ymolchi.

Cafodd corff Ms Dowey ei ddarganfod wedi i dad Pickering ffonio 999 oherwydd pryder am iechyd meddwl ei fab, er nad oedd yn gwybod beth oedd wedi digwydd.

Clywodd y llys bod Georgina Dowey wedi bod yn ddioddefwr trais yn y cartref yn y gorffennol

Pan gafodd Pickering ei arestio, fe'i clywyd ar gamera'r heddlu yn dweud ei fod "yn amddiffyn fy hunan", a bod Ms Dowey wedi bod "yn ddim byd ond trafferth".

Wedi'r rheithfarn, dywedodd y Barnwr Paul Thomas y dylai Pickering baratoi "am un ddedfryd yn unig, sef carchar am oes".

Cyn i Pickering gael ei ddedfrydu, fe glywodd y llys ddatganiad gan ferch Georgina Dowey, Chelsea, a ddisgrifiodd y "torcalon" roedd y teulu wedi ei ddioddef.

Roedd Pickering wedi lladd ei mam "yn y ffordd mwyaf erchyll a di-urddas posib", meddai.

"Wna i fyth faddau i ti am beth wnes di i fy mam, am ddinistrio ein bywydau," meddai.

Cafodd corff Georgina Dowey ei ganfod ar Stryd Beaconsfield yn Llangatwg

Wrth ddedfrydu, dywedodd y barnwr Paul Thomas KC fod Pickering wedi "llofruddio dynes fregus iawn mewn modd ciaidd".

"Mae'n rhaid ei fod wedi bod yn ffordd arswydus o farw, a byddai hi wedi dioddef nid yn unig yn gorfforol ond yn seicolegol," meddai.

Roedd Pickering wedi ceisio cuddio'r hyn a wnaeth "yn bwyllog a threfnus", gan gael gwared ar dystiolaeth fel ffonau symudol.

Ar ôl cael ei arestio roedd wedi ceisio creu "honiad hollol ffug ei bod hi wedi ymosod arnoch chi gyda chyllell".

Y realiti, meddai'r barnwr, oedd bod Pickering wedi lladd Ms Dowey "mewn cenfigen" ar ôl gweld negeseuon ar ei ffôn gan ddyn arall.

Wrth ddedfrydu Pickering i isafswm o 17 mlynedd a hanner dan glo, nododd y Barnwr Thomas na fyddai'n gymwys i ystyried cael ei ryddhau nes 2040, pan fydd yn ei 60au hwyr.