George North 'yn esiampl i chwaraewyr rygbi'r gogledd'

Daeth y cyhoeddiad yr wythnos hon y bydd George North yn ymddeol o chwarae dros Gymru yn dilyn y gêm yn erbyn Yr Eidal ddydd Sadwrn, a hynny wedi 14 mlynedd o wisgo'r crys coch.

Aeth North i Ysgol Uwchradd Bodedern ar Ynys Môn wrth gwrs, ac yna chwarae dros glybiau Llangefni a Phwllheli.

Felly sut mae ei lwyddiant rhyngwladol wedi effeithio ar boblogrwydd rygbi yng ngogledd Cymru?

Yn ôl Dafydd Roberts, sy'n swyddog rygbi dros Undeb Rygbi Cymru yn y gogledd, mae gweld rhywun fel George North yn serennu wedi galluogi i blant ifanc y gogledd freuddwydio.

Yn siarad ar Dros Ginio ar Radio Cymru, dywedodd Dafydd: "I lot o chwaraewyr o gwmpas y clybiau yng ngogledd Cymru, George North ydi'r dyn mae nhw'n edrych fyny ato - ac isio yr un fath o brofiadau a llwyddiant mae o wedi ei gael yn chwarae dros Gymru, y Scarlets a'r Gweilch."

North yw'r unig Gymro i chwarae yn rownd yr wyth olaf yng Nghwpan y Byd ar bedair achlysur

"Cyn George, Robin McBryde oedd yr enw mawr o'r gogledd", medai Dafydd, "does 'na ddim llawer o'r gogledd sydd wedi gwneud argraff dros Gymru."

• George North: Ei yrfa mewn lluniau

• George North i ymddeol o rygbi rhyngwladol

Mae Dafydd yn falch hefyd fod 'na gynnydd wedi bod yn nifer y bobl ifanc sy'n chwarae rygbi yn y gogledd dros y blynyddoedd diweddar.

"Eleni 'dan ni wedi cael y nifer fwyaf o bobl yn cofrestru i chwarae'r gêm erioed, 'dan ni wedi torri'r record yna yn y gogledd eleni.

"Ond dim just o ran faint sy'n chwarae, mae'r safon wedi codi hefyd. Rydan ni fel rhanbarth Rygbi Gogledd Cymru yn lot fwy cystadleuol rŵan yn erbyn y rhanbarthau Cymreig eraill, 'dan ni'n cystadlu 'efo nhw ar lefel dan-15, dan-16 a dan-18."

Dafydd gyda rhai o aelodau o garfan ifanc Rygbi Gogledd Cymru ar Barc yr Arfau

Fel un o hyfforddwr y tîm dan-18 ym Mhencampwriaeth Rhanbarthol Cymru y tymor hwn, mae Dafydd wedi ei blesio gyda safon ei dîm.

"Fe gawsom ni fuddugoliaeth yn erbyn Caerdydd yn y gêm gyntaf yn y gystadleuaeth - 'dan ni erioed wedi curo Caerdydd o'r blaen.

"Fe gollon ni funud olaf yn erbyn y Dreigiau a chwarae gemau cystadleuol yn erbyn y Scarlets a'r Gweilch."

'Talent cyffrous' ar y ffordd

O ganlyniad i'r perfformiadau addawol, fe gafodd sawl chwaraewr o'r rhanbarth eu henwi yng ngharfan dan-18 Cymru er mwyn cystadlu mewn gemau yn Yr Alban ac Iwerddon.

Roedd wyth o chwaraewyr wedi eu cynnwys ar gyfer y gemau, sef y nifer fwyaf o ogleddwyr yng ngharfan dan-18 Cymru erioed.

Mae Harri Ford, Patrick Nelson a Will Austin i gyd hefyd yn rhan o garfan dan-20 Cymru ar gyfer y Chwe Gwlad eleni - y tri yn hanu o'r gogledd, sydd yn destun balchder i Dafydd Roberts.

Dafydd gyda rhai o'r gogleddwyr ifanc sydd wedi cynrychioli Cymru yn ddiweddar

"Mae'r rhifau'n cynyddu, rydym ni'n fwy cystadleuol, felly gobeithio y gallwn ni weld mwy o hogia o'r gogledd yn y dyfodol dim just un fel George North - tri neu bedwar yn dod drwyddo yn gyson gobeithio.

"[Mae 'na] lot o dalent cyffrous, er ei bod yn anodd dweud pan mae nhw yn 15 i 18 mlwydd oed. Roedd George North yn seren rygbi'r byd, dydy chwaraewyr fel George North ddim yn dod o gwmpas yn aml.

"Ond mae 'na lot o dalent fyny yn y gogledd, a dwi'n siŵr y byddwn ni'n gweld enwau bechgyn gogledd Cymru yn cynrychioli Cymru ar lefel dan-18, dan-20 a gobeithio'r tîm cyntaf, a cheisio creu argraff fel mae George wedi ei wneud dros y 10 mlynedd ddiwethaf."

Hefyd o ddiddordeb:

• Y ffermwr sy'n creu argraff yn rygbi'r gynghrair

• John Davies ac oes aur Crysau Duon Cymru

• Shane Williams: 'Fy hoff geisiau Chwe Gwlad'