George North i ymddeol o rygbi rhyngwladol

Mae canolwr Cymru, George North wedi cyhoeddi ei fod yn bwriadu ymddeol o rygbi rhyngwladol ar ôl gêm olaf Cymru ym Mhencampwriaeth y Chwe Gwlad eleni.

Y gêm gartref yn erbyn yr Eidal ddydd Sadwrn fydd y tro olaf i North, 31, gynrychioli ei wlad.

Mae'r gŵr o Fôn wedi ennill 120 o gapiau hyd yma - dim ond Alun Wyn Jones a Gethin Jenkins sydd wedi chwarae mwy o gemau yn y crys coch.

Bydd North yn parhau i chwarae i'w glwb, wedi iddo gyhoeddi y bydd yn symud o'r Gweilch i Provence yn Ffrainc y tymor nesaf.

• Gyrfa George North mewn lluniau

• North a Tompkins yn dychwelyd i dîm Cymru

North yw'r enw mawr diweddaraf i ymddeol o rygbi rhyngwladol, gan ddilyn Alun Wyn Jones, Justin Tipuric, Rhys Webb, Dan Biggar a Leigh Halfpenny.

Roedd wedi awgrymu yn wreiddiol y byddai'n hoffi parhau i chwarae i Gymru er y symudiad i Ffrainc.

Ym mis Tachwedd y llynedd, dywedodd nad oedd ganddo unrhyw fwriad i roi'r gorau i rygbi rhyngwladol.

Ond fe ddywedodd Warren Gatland ei fod wedi cynnal "trafodaethau gonest" gyda North ynglŷn â'i allu i chwarae mewn pumed Cwpan Rygbi'r Byd.

Fe chwaraeodd North ei gêm gyntaf i Gymru yn erbyn De Affrica ym mis Tachwedd 2010

Ym Mhencampwriaeth y Chwe Gwlad eleni chafodd North ddim ei ddewis ar gyfer y gêm gyntaf yn erbyn yr Alban, a hynny er iddo wella o anaf.

Fe ddychwelodd i'r tîm wnaeth herio Lloegr ac Iwerddon, cyn colli ei le ar gyfer y golled yn erbyn Ffrainc.

Mae North wedi ei ddewis fel canolwr ar gyfer gêm olaf Cymru ym Mhencampwriaeth y Chwe Gwlad eleni yn erbyn Yr Eidal.

Bydd Cymru yn ceisio osgoi'r llwy bren am y tro cyntaf ers 2003 ar ôl colli eu pedair gêm flaenorol yn y gystadleuaeth eleni.

'Gwireddu fy mreuddwyd'

Mewn datganiad ar wefan X, dywedodd North: "Rydw i wedi penderfynu mai'r gêm ddydd Sadwrn fydd yr olaf yn fy ngyrfa ryngwladol.

"Wedi 14 mlynedd mae'n teimlo fel mai nawr yw'r amser iawn i gymryd cam yn ôl.

"Rydw i wedi caru bob eiliad gwerthfawr mewn crys coch, ac wedi bod yn ddigon ffodus i chwarae ochr yn ochr â chwaraewyr arbennig.

"Rwy'n ffodus iawn i fod wedi gallu gwireddu fy mreuddwyd.

"Rwy'n edrych 'mlaen at y bennod nesaf. Diolch i chi gyd am yr holl gefnogaeth dros y blynyddoedd."