Disgwyl enwi Chris Coleman fel olynydd Speed

Mae Chris Coleman wedi rheoli yn Lloegr, Spaen a Gwlad Groeg

Mae disgwyl i'r Cymro Chris Coleman gael ei enwi fel rheolwr newydd Cymru ddydd Iau.

Mae Cymdeithas Bêl-droed Cymru wedi galw cynhadledd i'r wasg yng Nghaerdydd lle bydd y penodiad yn cael ei gadarnhau.

Bu cyn-amddiffynnwr Cymru yn cynnal trafodaethau gyda'r Gymdeithas yn gynharach yn yr wythnos.

Daw hyn ar ôl iddo ddweud bod ganddo ddiddordeb i olynu ei gyfaill Gary Speed.

Bu farw Speed ym mis Tachwedd.

"Mae pob rheolwr ryw ddiwrnod eisiau bod yng ngofal ei wlad, a dwi ddim yn wahanol," meddai Coleman, 41 oed, ddydd Sul.

'Balch'

"Ond fe fyddwn i'n dymuno petai'r amgylchiadau yn wahanol.

"Os mai fi fydd yn cael y swydd fe fyddaf yn Gymro balch."

Mae'r Gymdeithas wedi bod yn ofalus iawn i ganfod rheolwr newydd ar ôl marwolaeth Speed.

Dywedodd Coleman fod swyddogion wedi cysylltu gyda fo'r wythnos diwethaf ar ôl iddi ymddiswyddo fel rheolwr Larissa oherwydd problemau ariannol yn y clwb yng Ngwlad Groeg.

Yr unig berson arall i ddweud yn gyhoeddus fod ganddo ddiddordeb yw John Hartson.

Ond mae enwau Ryan Giggs ac Ian Rush wedi eu cysylltu â'r swydd hefyd.

Mae'r Gymdeithas yn awyddus i'r broses o benodi olynydd fod yn hwylus ac adeiladu ar yr hyn y sefydlodd Speed dros y flwyddyn ddiwethaf.

Mae Coleman wedi dweud ei fod yn barod i weithio gyda'r rheolwyr cynorthwyol Raymond Verheijen ac Osian Roberts.

Mae nifer o chwaraewyr Cymru wedi rhoi cefnogaeth i'r ddau i barhau fel rhan o'r tîm hyfforddiant.

Profiad

Mae Capten Cymru, Aaron Ramsey, wedi dweud bod angen "cyn lleiad o newid â phosib".

Wedi blwyddyn allan o'r gamp fe wnaeth Coleman ddewis mynd i reoli Larissa ym mis Mai 2011.

Bu am ddwy flynedd a hanner tan 2010 yn rheoli Coventry.

Mae o hefyd wedi rheoli Real Sociedad.

Daeth ei yrfa chwarae i ben yn 32 oed wedi iddo gael damwain car ond cafodd ei benodi o fewn y flwyddyn yn rheolwr ar Fulham.

Yn ystod y pedair blynedd y bu wrth y llyw yn Craven Cottage aeth a'r clwb i'w safle ucha yn yr Uwchgynghrair, nawfed, cyn cael ei ddiswyddo yn 2007.

Mae'r Gymdeithas Bêl-droed yn awyddus i benodi rheolwr cyn gêm gyfeillgar Cymru yn erbyn Costa Rica yn Stadiwm Dinas Caerdydd ar Chwefror 29.

Bydd y gêm yn cael ei chwarae er cof am Speed.