Y frech goch ar gynnydd eto

Hon yw'r wythnos olaf y bydd y brechiad MMR yn cael ei gynnig mewn ysgolion

Mae nifer achosion y frech goch wedi cynyddu eto.

Erbyn hyn mae 1,325 o achosion wedi eu cofnodi ar draws Cymru ers dechrau Tachwedd 2012.

Dim ond 19 achos gafwyd yn ystod 2011.

Dyma'r wythnos olaf y bydd sesiynau brechu yn cael eu cynnal mewn ysgolion ac mae Iechyd Cyhoeddus Cymru yn annog rhieni i achub y cyfle i drefnu rhoi'r pigiad yw plant.

Yn benodol, maen nhw am i unigolion rhwng 10 a 18 oed dderbyn y brechiad MMR gan mae dyma'r grŵp sydd wedi ei effeithio fwyaf gan ledaeniad y clefyd.

'Llenwi'r ffurflen'

Dywedodd Dr Marion Lyons, Cyfarwyddwr Gwarchod Iechyd gydag Iechyd Cyhoeddus Cymru: "Dyma'r wythnos olaf y bydd plant mewn ysgolion ar draws Cymru yn cael cynnig y brechiad MMR.

"Felly rydym yn atgoffa'r rheini gyda phlant sydd ddim wedi derbyn y ddau ddos o'r MMR i lenwi'r ffurflen ganiatâd i sicrhau eu bod yn cael y brechiad.

"Mae plant dros 16 oed yn medru cael y brechiad heb y ffurflen caniatâd."

Llai na thraean

Mae modd i bobl gael y brechiad drwy fynd at eu meddyg teulu ac yn ystod y ddau fis diwethaf mae mwy na 50,000 wedi derbyn y brechiad.

Er hynny, roedd llai na thraean o'r rhain yn bobl rhwng 10-18 oed sydd yn achos o bryder i'r corff iechyd.

Mae sesiynau galw heibio wedi bod yn cael eu cynnig a ddydd Sadwrn bydd modd gwneud hyn yn Ysbyty Aberhonddu ac Ysbyty Y Drenewydd rhwng 10.30am a 2.30pm.