Achos Y Barri: 'Gwraig ddim yn abwyd' i ddenu plant

Avril a Peter Griffiths yn cyrraedd Llys y Goron Caerdydd

Mae dyn o'r Barri sydd wedi'i gyhuddo o gyfres o droseddau rhyw yn y 1980au a'r 1990au, wedi dweud nad oedd yn defnyddio'i wraig fel "abwyd" i ddenu plant.

Mae Peter Griffiths, 65, a'i wraig, Avril Griffiths, 61, yn gwadu cyhuddiadau hanesyddol o dreisio a cham-drin rhyw yn erbyn plant.

Fe wnaeth Mr Griffiths hefyd wadu "pimpio" merched allan i'w ffrindiau.

Roedd Mr Griffiths yn parhau i roi tystiolaeth ar ran yr amddiffyniad heddiw yn Llys y Goron Caerdydd, lle disgrifiodd ei berthynas a'i wraig fel un "wych".

Clywodd y llys mai Mrs Griffiths oedd "cariad cyntaf" Mr Griffiths, a bod y ddau wedi cwrdd pan roedd hi'n 13 neu 14.

• Achos cam-drin: Cyhuddiadau'n rhai 'ffug'

• Cwpl wedi 'tynnu lluniau noeth o blant'

• Pâr o'r Barri yn gwadu treisio a cham-drin

Fe glywodd y rheithgor hefyd fod Mr Griffiths yn gyfrifol am drefnu teithiau pysgota ar gyfer swyddogion heddlu, ac mai ef oedd "pwynt cyswllt yr heddlu".

Pan ofynnwyd iddo a oedd wedi "pimpio" merched i'w ffrindiau, dywedodd Mr Griffiths: "Na".

Gofynnwyd iddo hefyd os cafodd Mrs Griffiths ei defnyddio fel "abwyd" i ddenu merched ifanc er mwyn eu hecsbloetio - ond cafodd yr honiadau hyn eu gwadu hefyd.

Mae'r achos yn cael ei gynnal yn Llys y Goron Caerdydd

Un o'r cyhuddiadau yn erbyn y diffynnydd yw ei fod wedi cymryd llun anweddus o blentyn.

Dywedodd Mr Griffiths wrth y llys fod yr achwynydd wedi awgrymu creu'r lluniau ar ôl edrych ar gylchgrawn lle roedd Mrs Griffiths wedi ymddangos yn fron noeth.

Roedd y diffynnydd yn cytuno gyda'r awgrym fod Mrs Griffiths yn "rheoli" pethau pan gafodd y lluniau o'r achwynydd eu creu.

Ychwanegodd ei fod wedi cadw un o'r lluniau mewn "albwm" oedd yn cynnwys lluniau o Mrs Griffiths.

Mae Avril a Peter Griffiths yn gwadu'r cyhuddiadau yn eu herbyn ac mae'r achos yn parhau.