Coronafeirws: Gohirio Eisteddfod yr Urdd tan 2021

Bydd Eisteddfod yr Urdd yn cael ei gohirio tan 2021 o achos y sefyllfa bresennol gyda coronafeirws.

Fe all y cyhoeddiad olygu "ergyd ariannol o bron i £4m" i'r mudiad.

Dywed y mudiad y bydd tri gwersyll yr Urdd yn cau am y tro, ac fe fydd holl eisteddfodau lleol a rhanbarthol yr Urdd yn cael eu canslo hefyd.

Mae pob cystadleuaeth chwaraeon cenedlaethol a phob gweithgaredd gymunedol hefyd wedi eu canslo nes bydd rhybudd pellach.

Dywedodd prif weithredwr yr Urdd, Siân Lewis: "Mae'n siom enbyd i ni i gyd orfod cau ein gwersylloedd a chanslo ein digwyddiadau, ond mae diogelwch a lles ein staff, ein haelodau a'n cefnogwyr yn flaenoriaeth llwyr.

"Ein bwriad nawr yw mynd ati i ddiogelu'r mudiad trwy gynllunio dyfodol cynaliadwy a defnyddio ein hynni, ein hymrwymiad a'n gwerthoedd i helpu Cymru i ymdopi â'r argyfwng hwn.

"Bydd y mudiad, a ffurfiwyd bron i ganrif yn ôl ar egwyddorion o ymrwymiad cadarn i Gymru a chyd-ddyn, yn trafod y sefyllfa bresennol gyda gweinidogion y llywodraeth a hefyd yn edrych ar sut y gellid defnyddio'r Urdd a'i staff i ymateb i'r heriau cynyddol sy'n wynebu'r henoed a'r bregus yng Nghymru yn nghysgod y feirws hwn."

• Coronafeirws: Beth sydd wedi'u gohirio neu ganslo?

• Coronafeirws: Galw am gau ysgolion a phrifysgolion

• Amserlen: Effaith haint coronafeirws yng Nghymru

Bydd Eisteddfod yr Urdd nawr yn cael ei chynnal yn Sir Ddinbych ym mis Mai 2021 ac mae'r Urdd "yn trafod yn barhaus gyda'i bartneriaid darlledu, S4C a BBC Radio Cymru, o ran yr opsiynau i ddathlu doniau'r aelodau ar blatfform gwahanol yn 2020" medd y mudiad.

Dywedodd yr Urdd fod "canslo digwyddiadau mawr a chau'r gwersylloedd yn naturiol yn cyflwyno heriau ariannol sylweddol i'r Urdd" ac mae amcangyfrif cychwynnol yn awgrymu y "bydd ergyd ariannol o bron i £4m yn dilyn cyhoeddiadau heddiw".

"Bydd symud Eisteddfod Dinbych i 2021 yn golygu y bydd Eisteddfod Sir Gaerfyrddin 2021 rŵan yn symud i 2022," meddai llefarydd.