Galw am hyfforddi rhagor o feddygon gofal dwys

ward gofal dwysSudok 1/ Getty Images

Mae yna bryder y bydd prinder sylweddol o feddygon gofal dwys yng Nghymru os na fydd yna ragor o hyfforddiant yn cael ei gynnig.

Yn ôl Dr Jack Parry-Jones, sy'n ymgynghorydd gofal dwys yn y de-ddwyrain, roedd yna brinder meddygon yn y rhan fwyaf o unedau gofal dwys Cymru cyn i'r pandemig coronafeirws daro.

Mae'n galw am ragor o lefydd hyfforddi i feddygon gofal dwys yn ogystal ag uwchraddio'r unedau eu hunain.

Mae Addysg a Gwella Iechyd Cymru (AaGIC), y corff sy'n gyfrifol am hyfforddi meddygon, yn dweud bod yna "gynnydd cynaliadwy" wedi bod mewn llefydd hyfforddi.

Dywedodd llefarydd ar ran Llywodraeth Cymru: "Rydym wedi ymrwymo i wella faint o ofal dwys y gellid ei gynnig ar draws Cymru.

"Mae'r Gweinidog Iechyd hefyd wedi llunio rhaglen ar gyfer gwella gofal critigol gan gynnwys cyllid o £15m. Mae gofal critigol hefyd yn rhan o'n ymgyrch Hyfforddi Gweithio Byw."

'Swyddi ddim wedi'u llenwi'n iawn'

Yn ôl Dr Parry-Jones, sydd hefyd yn aelod o fwrdd Cyfadran Meddygaeth Gofal Dwys, mae unedau wedi eu staffio gan feddygon sydd ddim o anghenraid yn arbenigwyr mewn meddygaeth gofal dwys.

"Mae'r rhan fwyaf o unedau yn brin o feddygon sy'n arbenigo mewn meddygaeth gofal dwys. Mae hynny yn wir ymhlith ymgynghorwyr a meddygon ifanc," meddai.

Mae Dr Jack Parry-Jones yn poeni am brinder arbenigwyr gofal dwys yng Nghymru

"Y peth pwysig i'w nodi ydy nad ydy hanner y swyddi gofal dwys yn cael eu llenwi'n iawn.

"Beth rwy'n ei olygu ydy bod y rhan fwyaf o unedau gofal dwys Cymru, o dro i dro, yn gorfod defnyddio meddygon sydd ddim wedi eu hyfforddi yn y math yma o ofal er mwyn llenwi eu rotas.

"Fe fyddai'r shifftiau gwag yn tueddu i gael eu llenwi gan anesthetyddion ymgynghorol sydd â phrofiad o weithio mewn unedau gofal dwys yn hytrach nag ymgynghorwyr gofal dwys sydd wedi cael eu hyfforddi yn llawn a phasio arholiadau."

'Cynnydd mewn hyfforddiant'

Mae'r corff GIG sy'n gyfrifol am hyfforddi meddygon, Addysg a Gwella Iechyd Cymru, yn dweud bod yna welliant wedi bod yn ddiweddar yn y llefydd sydd ar gael i hyfforddi meddygon gofal dwys.

"Ers 2017 'dan ni wedi cynyddu nifer o lefydd parhaol i hyfforddi arbenigwyr mewn gofal dwys o 58%," meddai'r Athro Pushpinder Magnta, cyfarwyddwr meddygol AaGIC.

"Mae hwn yn gynllun sy'n gweld cynnydd cynaliadwy.

"Ry'n ni wedi parhau'r cynllun yma gyda llefydd newydd ar gyfer meddygon newydd eleni a chynllun i gynyddu nifer y llefydd y flwyddyn nesaf.

"Hefyd, 'dan ni wedi cynyddu nifer y llefydd hyfforddi mewnol sy'n golygu pob blwyddyn bydd 39 o feddygon dan hyfforddiant yng Nghymru yn gweithio ac yn ennill profiad mewn unedau gofal dwys ar draws Cymru."

Mae galw am gael unedau gofal dwys o'r un safon a'r un fydd yn Ysbyty Prifysgol Grange ger Cwmbrân

Er yn cydnabod bod nifer y meddygon sy'n cael eu hyfforddi mewn meddygaeth gofal dwys wedi cynyddu, mae Dr Jack Parry-Jones yn dal i fynnu bod yna brinder sylweddol.

"Mae 'na brinder sylweddol oherwydd bod yna ddiffyg arbenigwyr yn y lle cyntaf ac, wrth gwrs, mae 'na ymgynghorwyr yn ymddeol drwy'r amser.

"Yn y pen draw fe fydd 'na gyfyngiadau ar faint o feddygon y bydd hi'n bosib i'w hyfforddi ar yr un pryd," meddai. "Ond ar hyn o bryd dyw hynny ddim yn broblem."

Gwasanaethau dan bwysau

Dywedodd Angela Burns AS, llefarydd y Ceidwadwyr ar iechyd, bod yn rhaid ymateb i'r bylchau staffio ar draws y Gwasanaeth Iechyd er mwyn cwrdd â'r gofyn.

"Gyda thristwch, dwi'n meddwl mai nid y pandemig yma ydy'r unig adeg y byddwn ni dan y fath bwysau. Felly mae'n rhaid i ni ei gwneud hi'n gwbl sicr y gallwn ni wella'r adnoddau ry'n ni eu hangen."

Mae'r Dr Parry-Jones yn credu bydd yn rhaid uwchraddio yr unedau eu hunain i gyrraedd yr un safon â'r uned fydd yn Ysbyty Prifysgol Grange fydd yn agor yn Llanfrechfa ger Cwmbrân y flwyddyn nesaf.

"Fe fydd yna uned yno gyda 30 o welyau gofal dwys, pob un ohonyn nhw wedi eu hynysu. Fe fyddai'r math yna o fuddsoddiad sydd wedi ei wneud gan Fwrdd Iechyd Aneurin Bevan yn gwneud byd o wahaniaeth," ychwanegodd Dr Parry-Jones.

"Yn amlwg mae angen yr un math o fuddsoddiad gan fyrddau iechyd eraill yn eu hunedau gofal dwys. Mae'r uned fwyaf yng Nghaerdydd ond 'chydig iawn o adnoddau ynysu sydd yno. Mae angen buddsoddi yno i ddod â'r uned i'r unfed ganrif a'r hugain."

Straeon perthnasol