Bygwth trywanu perchennog wrth geisio dwyn ei gi

Cafodd James Cosens ei fygwth gan ddau ddyn a oedd yn ceisio dwyn ei gi bach, Rosie

Mae tafarnwr wedi disgrifio sut y brwydrodd yn erbyn dau ddyn a oedd wedi bygwth ei drywanu tra'n ceisio dwyn ei gi.

Roedd James Cosens, 29, yn mynd â Rosie, ei ast ddefaid 20-wythnos oed, am dro yng ngwarchodfa natur Morfa Berwig yn ardal Bynea, ger Llanelli ddydd Sul.

Llwyddodd y cyn-focsiwr amatur i achub y ci ar ôl troi ar ei ymosodwyr.

Mae nifer o achosion honedig o ddwyn cŵn wedi digwydd mewn rhannau o dde a de-orllewin Cymru yn ddiweddar.

Dywedodd Mr Cosens, sy'n cadw tafarn y Bell Inn yn Bynea, Llanelli, bod ei gi bach wedi rhedeg tuag at ddau ddyn, a bod un ohonynt wedi codi'r anifail yn ei freichiau.

Dywedodd y dyn ei fod yn cymryd yr ast, ac y byddai'n trywanu Mr Cosens pe bai'n ceisio ei chael hi'n ôl.

Dywed Mr Cosens na welodd unrhyw arf ym meddiant y dyn, ond fel cyn-focsiwr amatur pwysau godrwm nid oedd am adael i'r dynion gymryd ei gi ar chwarae bach.

"Fe wnes i daro fe unwaith yn ei wyneb - yn galed, ac aeth i lawr," meddai Mr Cosens.

"Wedyn roedd 'na dipyn o ffrwgwd gyda'r ddau ohonom ar lawr wrth i mi geisio cael Rosie yn ôl.

Roedd Mr Cosens yn mynd â'i gi am dro yng ngwarchodfa natur Morfa Berwig ar y pryd

'Acenion Gwyddelig'

"Daeth y dyn arall draw, a rhedodd y ci i ffwrdd. Mi wnes i wynebu'r boi arall, a llwyddo i godi Rosie lan a mynd oddi yno," meddai Mr Cosens.

Dywedodd fod un o'r dynion yn ei 40au a'r llall yn ei 20au, a bod gan y ddau acenion Gwyddelig.

Mae Mr Cosens wedi rhoi manylion yr ymosodiad ar y gwefannau cymdeithasol i rybuddio eraill, ac mae hefyd wedi cysylltu â'i AS lleol, Nia Griffiths.

Mae Heddlu Dyfed-Powys yn ymchwilio i'r digwyddiad.

Mae sawl achos honedig o ddwyn cŵn wedi cael eu cofnodi yn y de-orllewin yn ddiweddar.

Ym mis Ionawr cafodd dau berson eu harestio a'u rhyddhau ar fechniaeth gan Heddlu Dyfed-Powys, ar ôl i 80 o gŵn gael eu darganfod ar safle yn sir Gaerfyrddin.

Pam bod achosion o ddwyn cŵn ar gynnydd?

Roedd 2020 yn un o'r blynyddoedd gwaethaf erioed am achosion o ddwyn cŵn, ac mae'n ymddangos bod eleni yn dechrau dilyn yr un patrwm.

Wrth i'r galw am gŵn bach fel anifeiliaid anwes gynyddu yn ystod y cyfnodau clo mae troseddwyr wedi gweld eu cyfle, yn ôl yr heddlu.

Dywedodd Dirprwy Brif Gwnstabl Heddlu Gwent Amanda Blakeman, sydd hefyd yn aelod o Gyngor Cenedlaethol Penaethiaid yr Heddlu, bod y cyfle i wneud elw wedi gwneud y farchnad gŵn yn fwy deniadol i ladron.

Dywedod Ms Blakeman: "Gall dwyn cŵn fod yn drosedd ddinistriol i deuluoedd sy'n achosi gofid difrifol i berchnogion.

"Er ei bod yn drosedd brin iawn, rydym wedi gweld cynnydd yn ddiweddar.

"Yn ystod y pandemig mae troseddwyr wedi addasu eu gweithgaredd ac maent yn cymryd mantais o'r galw mawr am anifeiliaid anwes yn ystod y cyfnod clo.

"Mae cost ci bach wedi mynd i fyny'n sylweddol dros y flwyddyn diwethaf sydd wedi ei gwneud hi'n farchnad fuddiol iawn i droseddwyr."

Rhybuddiodd berchnogion i fod yn ofalus rhag rhoi lluniau o'u cŵn bach newydd ar y gwefannau cymdeithasol ac i brynwyr ystyried o ble y mae'r anifail wedi dod.

Beth yw gwerth eich ci?

Dywed Yr Ymddiriedolaeth Gŵn bod nifer y bobl oedd yn gwneud ymholiadau ynglŷn a mabwysiadu cŵn o ganolfannau achub, wedi cynyddu o 62% yn 2020, o'i gymharu â'r flwyddyn cynt.

Roedd yr elusen wedi gweld prisiau cŵn bach yn codi'n aruthrol, wrth i werthwyr fanteisio ar y galw hefyd.

Ac ar ddechrau Ionawr eleni roedd mwy na 1,000 o hysbysebion am gŵn ar wefannau mân hysbysebion - cynnydd o 59% ar yr un cyfnod yn 2020.

Mae'r pris am rai o'r bridiau mwyaf poblogaidd wedi parhau i godi.

Yn ôl yr elusen, roedd pris corhelgi (beagle) wedi codi 157% rhwng Mawrth a Rhagfyr 2020 - cynnydd ar gyfartaledd o £563.13 i £1,447.59.

Aeth prisiau'r brid chow i fyny 145% o £1,118.89 i £2,742.39 yn yr un cyfnod, yn ogystal â dachshunds a aeth i fyny mewn pris o £972.62 i £2061.54.

Mae prisiau cŵn tarw Ffrengig a chŵn smwt (pugs) wedi dyblu bron, ac mae cŵn tarw Seisnig bellach yn costio tua £2,666.74 o'i gymharu â £1,636.78 ym mis Mawrth y llynedd.

Dywedodd prif weithredwr yr Ymddiriedolaeth Gŵn,  Owen Sharp nad oedd hi'n syndod bod troseddwyr yn manteisio ar y sefyllfa, ac mae'r elusen wedi galw am gosbau llymach gan y llysoedd.

"Nid yw dedfrydau presennol y llysoedd barn yn gwneud fawr ddim i atal lladron ac nid ydynt yn cymryd i ystyriaeth pa mor ddinistriol y gall dwyn cŵn fod i'w perchnogion.

"Mae cosbau am ddwyn cŵn yn cael eu penderfynu ar sail gwerth ariannol y ci, sy'n aml yn golygu fod troseddwyr yn cael dirwy sydd ddim yn adlewyrchu ergyd emosiynol colli cŵn ar deuluoedd."

Cafodd dros 30 ci y credir iddyn nhw gael eu dwyn eu darganfod mewn fan yn Cheltenham ym mis Awst