Cyffro cael perfformio eto ond amheuon trefn y pàs

Mae cerddorion ac artistiaid yn dweud bod cael perfformio'n fyw eto "fel breuddwyd".

Nos Iau, cychwynnodd gŵyl Focus Wales yn Wrecsam, sy'n rhoi llwyfan i tua 300 o artistiaid, yn bennaf dan do.

Yn ôl y gantores Eädyth, mae 'na "gyffro" wedi cyfnod ble nad oedd gigio'n bosib.

Ond mae rheolwr un clwb nos yn dweud bod angen oedi cyn cyflwyno rheolau newydd i'r sector.

• Pàs Covid: Beth sy'n rhaid i chi wybod?

O ddydd Llun, bydd yn rhaid dangos pàs Covid i fynd i glybiau neu ddigwyddiadau mawr.

Mae'r Prif Weinidog Mark Drakeford wedi mynnu fod y pasys Covid yn "syml".

Mae'r cyhoedd wedi ymateb yn dda i'r mesurau atal Covid, medd un o sylfaenwyr Focus Wales, Neal Thompson

Cafodd Focus Wales ei gohirio ddwywaith yn ystod misoedd cyntaf y pandemig, ac i Neal Thompson, un o'r sylfaenwyr, mae'n teimlo'n "weird, ond rili dda" i'w chynnal o'r diwedd.

Mae'n rhaid i bobl ddilyn mesurau fel profion Covid llif unffordd gorfodol i gael mynd i'r ŵyl.

"Mae pawb wedi ymateb yn rili dda ac yn bositif i hynne," meddai Neal.

"Mewn ffordd, mae pobl yn deall pam 'dan ni'n gofyn am hynne gennyn nhw."

'Mor gyffrous'

Cyn perfformio yng nghlwb y Central nos Iau, dywedodd Eädyth ei bod "mor mor excited" o gael chwarae'n fyw.

"Mae 'na obviously nerves o gwmpas y lle, ond dwi mor gyffrous i fod ar y llwyfan eto, i fod o flaen cynulleidfa," meddai.

"Mae'n teimlo fel mae o ddim go iawn, ti'n gwybod? Mae'n rili neis - mae'n freuddwyd."

Ond i sawl un o'r lleoliadau sy'n cynnal gigiau Focus Wales, bydd y drefn yn newid ddydd Llun, wrth i basys Covid ddod yn orfodol yn y sector.

Mae Guto Brychan, sy'n rhedeg Clwb Ifor Bach yng Nghaerdydd, yn galw ar y llywodraeth i oedi.

"Mae ond 'di bod yn dair wythnos ers iddyn nhw wneud y penderfyniad, mae ond wedi cael ei basio yn y Senedd ddydd Mawrth diwethaf, ac mae'n dod i rym dydd Llun," meddai.

"Dyw e ddim yn rhoi llawer o amser i ni fel sector i gael y neges i'n cwsmeriaid bod hyn yn dod i rym Dwi ddim 'di gweld dim byd mawr gan y llywodraeth eto o ran ymgyrch farchnata'n sôn am y newidiadau."

Ychwanegodd: "Dwi'n teimlo bod 'na le i ddweud wrth y llywodraeth 'dewch â'r system i fewn ond rhowch cwpl o wythnosau i ni dreialu'r systemau'."

'Mae'n syml'

Ar raglen Dros Frecwast dydd Gwener, dywedodd y prif weinidog, Mark Drakeford, bod pobl sydd wedi teithio dramor yn ddiweddar yn gyfarwydd â'r pasys yn barod.

"Dydy'r pàs Covid ddim yn rhywbeth newydd i bobl - mae pobl Cymru wedi bod yn defnyddio nhw ers misoedd," meddai.

"Mae lot o brofiadau 'da ni yn barod, ni wedi cyhoeddi gwybodaeth i bobl. Mae'n syml."

Rhys Underdown o'r grŵp Bandicoot

Un band sydd â sawl gig yn Wrecsam dros y penwythnos yw Bandicoot o Abertawe.

Mae'r canwr, Rhys Underdown, yn "hyderus" bydd y diwydiant yn addasu i unrhyw gyfyngiadau pellach yn y pendraw.

Ac yn bennaf oll, mae'n mwynhau cael bod ar lwyfan eto.

"Mae pobl wedi bod yn anhygoel - mae'n amlwg bod pawb wedi colli gigs gymaint â 'dan ni wedi! Ac mae hynny mor braf i'w weld."