Storm Barra: Gwynt yn hyrddio 86 mya yn Aberdaron

Fe wnaeth coeden ddisgyn ar adeilad fferm ym Mynachlog-ddu, Sir Benfro yn y tywydd garw ddydd Mawrth

Mae gwyntoedd cryfion wedi achosi mwy o doriadau i gyflenwad pŵer a thrafferthion teithio ledled Cymru ddydd Mawrth.

Dywedodd y Swyddfa Dywydd fod disgwyl gwyntoedd o hyd at 70mya mewn lleoliadau arfordirol agored.

Ond brynhawn Mawrth cadarnhaodd y Swyddfa Dywydd bod gorsaf dywydd Aberdaron wedi cofnodi hyrddiad o gyflymder 86 mya.

Mae hynny'n gryfach na chyflymder y gwynt yn ystod Storm Arwen - adeg honno cofnodwyd hyrddiad o 81 mya yn Aberporth.

Rhybuddiodd Cyngor Gwynedd nos Fawrth bod amodau gyrru "yn ddrwg heno" wrth gadarnhau bod yr A497 o Efailnewydd i Bwllheli ar gau wedi i goeden gwympo.

Bydd Ysgol Bryngwyn yn Llanelli ar gau ddydd Mercher wedi i wyntoedd cryfion achosi difrod i ran o do'r ysgol am oddeutu 16:00 brynhawn Mawrth. Chafodd neb anaf.

Difrod i ran o do Ysgol Bryngwyn yn Llanelli sy'n golygu bod yr ysgol ar gau ddydd Mercher

Gydol dydd Mawrth, mae cannoedd o gwsmeriaid Western Power Distribution wedi bod heb drydan mewn ardaloedd gwasgaredig ar draws de Cymru.

Erbyn nos Fawrth roedd y nifer heb drydan dros 500, gan gynnwys dros 300 yn ardal Arberth a bron i 200 yn ardal Pont-iets.

Mae'r rhybudd tywydd diweddaraf mewn grym trwy gydol y dydd o 09:00 fore Mawrth

Fe wnaeth cwmni Stena Line ganslo pob fferi rhwng Abergwaun a Rosslare oherwydd y tywydd garw.

Mae 'na gyfyngiadau teithio ar yr A55 Pont Britannia, a'r M48 Pont Hafren, ac mae Trafnidiaeth Cymru'n annog teithwyr trên i chwilio am y wybodaeth ddiweddaraf ar-lein cyn dechrau ar eu taith.

Hefyd mae Pont Cleddau - yr A477 - ar gau yn llwyr i'r ddau gyfeiriad.

Mae'r rhybudd tywydd diweddaraf mewn grym ledled y wlad a thrwy gydol y dydd ers 09:00 fore Mawrth.

Mae disgwyl i'r gwyntoedd cryfion barhau yn y de hyd at 18:00 nos Fercher, yn ôl y rhybudd melyn, ac mae rhybuddion llifogydd mewn grym gan Gyfoeth Naturiol Cymru ar draws y wlad.

Roedd rhybudd ar wahân am rew ac amodau peryglus mewn grym ar gyfer y gogledd-ddwyrain dros nos, nes fore Mawrth.

Achosodd Storm Arwen drafferthion am sawl diwrnod ar ôl taro'r penwythnos diwethaf.

Roedd miloedd o gartrefi heb bŵer, ffyrdd wedi'u blocio a chafodd gwasanaethau rheilffordd eu hatal.

Dywedodd y Swyddfa Dywydd y gallai fod "rhywfaint o golli pŵer yn y tymor byr" o ddydd Mawrth.

Fe allai hefyd fod oedi ar drafnidiaeth ffyrdd, rheilffyrdd, awyr a fferi a gallai tonnau mawr effeithio ar gymunedau arfordirol, meddai.

Cafodd dros 50 o goed prin hynafol eu llorio yng Ngerddi Bodnant yn ystod Storm Arwen

• Storm yn llorio dros 50 o goed prin Gerddi Bodnant

• Storm Arwen: Tai yn colli pŵer a threnau wedi'u canslo

Cofnodwyd gwyntoedd gwynt o 81mya ddydd Sadwrn diwethaf, gan adael 30,000 o bobl heb bŵer ar un adeg yng Nghymru.

Fe wnaeth Many Tears Animal Rescue yn Llanelli hefyd golli eu cyflenwad trydan, a arweiniodd at farwolaeth un o'r cŵn bach newydd anedig.

Yn Nyffryn Conwy, cafodd dros 50 o goed prin hynafol eu llorio yn un o erddi mwyaf adnabyddus Cymru.

Bu'n rhaid canslo penodau byw o I'm a Celebrity... Get Me Out of Here! hefyd ar ôl i'r storm achosi "difrod sylweddol" i'r set yng Nghastell Gwrych yn Abergele, sir Conwy.

Mae rhai cartrefi yn dal heb bŵer yn Lloegr a'r Alban, gyda gweinidog yn Llywodraeth y DU yn dweud fod hynny'n "gwbl annerbyniol".