Hafod Eryri ar ben yr Wyddfa i barhau ar gau yn 2022

Bydd yr orsaf drenau a chanolfan ymwelwyr ar gopa'r Wyddfa yn parhau ar gau yn 2022 oherwydd effaith y pandemig ar y gweithlu.

Yn ôl Rheilffordd yr Wyddfa, mae angen cwblhau gwaith hanfodol i'r cledrau a gafodd ei ohirio yn wreiddiol pan oedd staff ar ffyrlo yn 2019-2020.

Ond bydd trenau'n parhau i redeg hyd at orsaf Clogwyn, sydd tua 300 metr yn is na'r copa.

Mae disgwyl i'r ganolfan ar gopa'r Wyddfa, Hafod Eryri, ailagor ar gyfer tymor 2023.

• Trên Bach Yr Wyddfa yn ôl ar y cledrau

• Heriau'n debygol pe bai cais i godi tâl ar Yr Wyddfa

Dywedodd Carrie Druce, Rheolwr Marchnata'r rheilffordd bod adnoddau a heriau staffio oherwydd y pandemig wedi oedi'r gwaith.

"Bob blwyddyn, rydym yn ailosod elfennau o'r rheilffordd ond oherwydd cyfyngiadau'r pandemig ar y gweithlu ac ar adnoddau yn ystod 2019-2020, doedd hi ddim yn bosib cwblhau'r gwaith hanfodol hyn.

"Ry'n ni felly wedi dechrau ar y gwaith yn hwyr yn 2021 i mewn i 2022 sy'n golygu y bydd yn rhaid i'r rheilffordd uwchben Clogwyn barhau ar gau," eglurodd Ms Druce.

"Mae'r gwaith hwn yn defnyddio buddsoddiad ariannol sylweddol ac adnoddau staff nad oedd ar gael yn ystod y pandemig."

Ychwanegodd Ms Druce y bydd y gwasanaeth diesel traddodiadol yn rhedeg i orsaf Clogwyn rhwng 1 Ebrill 2022 a diwedd hydref, a'r trên stêm yn rhedeg dros fisoedd yr haf.