Cwpan y Byd: Cyfle i ddangos fod Cymru'n 'genedl ei hun'

Mae nifer o gefnogwyr Cymru wedi mynegi pryderon am y ffordd mae Qatar yn trin menywod a phobl LHDT+

Mae Llywodraeth Cymru wedi amddiffyn y penderfyniad dadleuol i yrru cynrychiolwyr i Gwpan y Byd yn Qatar.

Dywedodd y Gweinidog Economi Vaughan Gething fod y gystadleuaeth yn gyfle i ddangos i'r byd fod Cymru'n "genedl ei hun o fewn y DU".

Yn ôl Mr Gething bydd Llywodraeth Cymru'n "adlewyrchu ein gwerthoedd" yn y dwyrain canol.

Bydd Mr Gething a'r Prif Weinidog Mark Drakeford yn mynychu dwy o gemau grŵp Cymru, er eu bod wedi wynebu galwadau i beidio â theithio i Qatar.

• Drakeford 'ddim yn torri boicot' wrth fynd i Qatar

• Gweinidog llywodraeth ddim am fynd i gêm Cymru v Iran

Mae plaid Lafur y DU wedi penderfynu na fydd yr arweinydd Syr Keir Starmer na ffigyrau blaenllaw eraill o fewn yn blaid yn mynychu Cwpan y Byd.

Mae'r AS Llafur Chris Bryant ac arweinydd y Democratiaid Rhyddfrydol Ed Davey ymysg y rheiny sydd wedi dweud na ddylai Llywodraeth Cymru fynd chwaith.

Ond dywedodd Mr Gething ei bod yn "hollol resymol i bobl gymryd safbwyntiau gwahanol ar y mater".

Ychwanegodd mai "un o'r gwahaniaethau allweddol" ydy fod Llafur Cymru mewn llywodraeth, tra mai'r wrthblaid ydy Llafur dros y ffin.

Bydd Vaughan Gething yn mynychu'r gêm rhwng Cymru a Lloegr

Mae Qatar wedi wynebu beirniadaeth hallt oherwydd pryderon am hawliau dynol - gan gynnwys y ffordd mae menywod, pobl LHDT+ a gweithwyr o wledydd eraill yn cael eu trin yno.

Mae Llywodraeth Cymru yn ariannu cyfres o ddigwyddiadau ac ymgyrch farchnata gwerth £2m i gyd-fynd â Chwpan y Byd er mwyn ceisio defnyddio'r digwyddiad i hyrwyddo Cymru, yn enwedig yn yr Unol Daleithiau ac Ewrop.

Mae grŵp o lysgenhadon, sy'n cynnwys cyn-gapten tîm merched Cymru, yr Athro Laura McAllister, a'r athletwr Colin Jackson, wedi cael eu recriwtio i gynrychioli'r wlad.

Yn gynharach yr wythnos hon dywedodd capten Cymru Gareth Bale eu bod yn bwriadu amlygu'r "problemau" yn Qatar.

Dywedodd Mr Gething mewn cynhadledd i'r wasg ddydd Mawrth: "Yng Nghwpan y Byd, pan fydd pobl yn gweld Cymru fe fyddan nhw'n gweld ein gwerthoedd.

"Mae Llywodraeth Cymru'n credu mewn gwaith teg, hawliau dynol, ac y dylai pawb ohonom fod yn rhydd i fyw ein bywydau fel ydym ni go iawn."

• 'Cefnogi chwaraewyr Cymru i siarad am hawliau Qatar'

• 'Nid cystadleuaeth yw ymateb i broblemau Qatar'

Ychwanegodd fod Llywodraeth Cymru wedi codi "pryderon difrifol" gydag awdurdodau Qatar am weithwyr o dramor a hawliau pobl LHDT+.

Dywedodd hefyd fod chwarae Lloegr yn "gyfle prin am gynulleidfa fyd eang i ddangos yn glir fod Cymru'n genedl ei hun o fewn y DU".

Mae Qatar wedi wynebu beirniadaeth hallt oherwydd pryderon am hawliau dynol

Bydd Mr Drakeford yn mynychu'r gêm yn erbyn yr Unol Daleithiau, tra bydd Mr Gething yn mynd i'r gêm yn erbyn Lloegr.

Mae Llywodraeth Cymru'n gobeithio y bydd cyfle i drafod gyda chynrychiolwyr o'r UDA yn Qatar, a bydd digwyddiad yn cael ei gynnal yn llysgenhadaeth y DU yn Washington i gyd-fynd â'r gêm.

Ond mae'r llywodraeth wedi cefnu ar y syniad o yrru'r dirprwy weinidog chwaraeon Dawn Bowden i Gwpan y Byd.

Dywedodd Mr Gething fod y penderfyniad i beidio â gyrru unrhyw un i'r gêm yn erbyn Iran yn "gymesur" oherwydd y protestiadau yno.

• Pam fod Cwpan y Byd 2022 mor ddadleuol?

• Pryd mae gemau Cwpan y Byd Cymru?

• Pêl-droed: 'Cyfle gwych' i gael mwy i ddysgu Cymraeg

Mae Llywodraeth Cymru wedi cefnogi 19 o brosiectau fel rhan o'r ymgyrch i hyrwyddo Cymru a "rhannu ein diwylliant, celfyddydau a threftadaeth".

Mae ymgyrch farchnata ar-lein hefyd, fydd yn cynnwys hysbysebion ar gyfryngau cymdeithasol.

Yn ogystal â hyrwyddo Cymru fel gwlad "flaengar", y gobaith yw herio stereoteipiau o'r wlad hefyd, fel y defnydd o ddreigiau a defaid.