Galw i ddefnyddio enwau lleoedd gwreiddiol Cymraeg yn swyddogol

Dadl Mihangel ap Rhisiart - sydd wedi dechrau'r ddeiseb - yw nad oes angen dau enw ar le

"Beth bynnag yw yr enw, does dim angen dau enw ar un lle."

Mae myfyriwr ymchwil o Frynaman, wnaeth ddechrau deiseb fis Rhagfyr diwethaf, yn galw am ddefnyddio enwau Cymraeg gwreiddiol yn unig ar leoedd mewn cyd-destun swyddogol.

Un enghraifft fyddai cael un enw ar arwydd ffordd, dywedodd Mihangel ap Rhisiart.

Ers i Barc Cenedlaethol Bannau Brycheiniog gyhoeddi ei fod yn dilyn ôl traed Eryri ac yn defnyddio enw Cymraeg yn unig, mae llawer mwy o ddiddordeb wedi bod yn y ddeiseb.

Fe ddechreuodd ar wefan change.org ond ar ôl i dros 1,000 o bobl dorri eu henwau mae y ddeiseb bellach wedi symud i safle deisebau Senedd Cymru.

• Enw Cymraeg yn unig i Barc Cenedlaethol y Bannau

• 'Cyfrifoldeb ar bob un' i warchod enwau lleoedd

• 'Enwau Cymraeg llefydd mewn perygl o ddiflannu'

Dywed Mr ap Rhisiart bod hwn yn bwnc all fod yn gymhleth ond mae yn dadlau fod ei syniad yn ei hanfod yn un syml.

"Mae hwn yn bwnc mawr o ran hanes enwau, efallai y bydden ni gallu mynd 'nôl a 'nôl i weld sut ma' enwau wedi newid dros y blynydde'.

"Ond, dwi ddim yn trio agor y pwnc i drafodaeth mwy cymhleth.

"Y cyfan yr ydw i yn ddweud yw - beth bynnag yw yr enw does dim angen dau enw ar un lle."

Mae Mihangel ap Rhisiart yn fyfyriwr ymchwil o Frynaman

Eisoes mae rhai yn holi, petai newid, a fydd pobl yn barod i newid eu harferion a defnyddio yr enwau Cymraeg.

Mae Mr ap Rhisiart yn pwysleisio y gallai pobl barhau i ddefnyddio enwau Saesneg yn ôl eu harfer, ond ei fod am weld yr enw Cymraeg ym mhob cyd-destun swyddogol ar gyfer lleoedd yng Nghymru.

"Ry'n ni yn siarad am lefydd lle mae pobol yn byw. Mae hanes iddyn nhw a bydd pobl yn defnyddio yr enwau y maen nhw wedi defnyddio trwy eu bywyde'.

"Dw i ddim yn trio cael pobl i newid eu harferion. Jyst rhwbeth swyddogol dw i'n siarad amdano, er enghraifft jyst cael un enw ar arwydd yr heol."

Os yw y ddeiseb yn cael 10,000 llofnod fe gaiff ei hystyried ar gyfer dadl yn y Senedd: "Dw i ddim yn siŵr a fydda' i yn cyrraedd y marc 10,000.

"Ond doeddwn i ddim yn disgwyl cymaint o ymateb. Mae hwn yn gyfle i bobl ddweud eu barn ar rh'wbeth a chael llais.

"Nawr ma bron i fil o bobl wedi torri eu henwau ar y ddeiseb wrth i ni siarad, felly mae mil o bobl wedi cytuno â fi ar y pwnc yma," ychwanegodd.