Drakeford yn 'hollol amharod' am 'ffyrnigrwydd galar' colli gwraig

Mae gan Mark a Clare Drakeford dri o blant, ac roedden nhw wedi byw ym Mhontcanna, Caerdydd ers 30 mlynedd

Mae'r prif weinidog wedi dweud ei fod yn "hollol amharod ar gyfer ffyrnigrwydd y galar" yn dilyn marwolaeth ei wraig y llynedd.

Bu farw gwraig Mark Drakeford, Clare, yn sydyn yn 71 oed ym mis Ionawr 2023.

Wrth siarad â Channel 5 News dywedodd Mr Drakeford ei fod yn dal yn ei chael hi'n anodd siarad am y pwnc.

Bydd Mr Drakeford yn ymddiswyddo ym mis Mawrth ar ôl mwy na phum mlynedd fel prif weinidog.

'Diolch byth am waith'

Pan ofynnwyd iddo ar Channel 5 am ei fyfyrdodau yn dilyn marwolaeth ei wraig, atebodd Mr Drakeford: "Diolch byth am waith.

"Mae bod mewn gwaith wedi bod yn gynhaliol, mae'n rhoi rhywbeth i chi ei wneud, mae'n rhoi rhythm i'r wythnos i chi, mae'n tynnu sylw oddi wrth yr hyn sydd fel arall yn brofiad hollol ddiflas.

"Roeddwn i'n hollol amharod ar gyfer ffyrnigrwydd y galar."

Ychwanegodd Mr Drakeford, oedd yn amlwg yn emosiynol, "unwaith y bydd y pwnc hwnnw wedi'i agor mae'n anodd iawn cadw [yr emosiwn] dan reolaeth".

Perthynas â phrif weinidogion

Mewn cyfweliad eang holwyd Mr Drakeford hefyd am ei berthynas â phrif weinidogion y gorffennol a'r presennol.

Dywedodd fod Rishi Sunak "yn berson haws i fod gydag ef na'r naill na'r llall o'i ragflaenwyr uniongyrchol".

"Yn y cyfnod byr roedd Liz Truss yn brif weinidog ni ddangosodd unrhyw ddiddordeb o gwbl mewn cael sgwrs".

"Rwy'n meddwl bod delio â Boris Johnson yn wahanol eto oherwydd y syniad eich bod yn delio â gwleidydd difrifol, rhywun i fyny i'r cyfrifoldeb o fod yn brif weinidog, byddwn wedi dweud a oedd yn rhy aml yn absennol yn fy nghysylltiad ag ef."

Mynegodd Mr Drakeford ei ofid hefyd am golli ei dymer yn y Senedd gydag arweinydd grŵp y Ceidwadwyr Cymreig, Andrew RT Davies yn 2022.

"Roeddwn i'n difaru ar unwaith, ni ddylech fyth golli'ch tymer," meddai Mr Drakeford.