'Dim bwriad gan Gymru i fod yn rhan o dîm Prydain yn 2028'

Dywedodd Noel Mooney nad yw erioed wedi trafod cynllun o'r fath gydag unrhyw un, a'i fod yn canolbwyntio ar Gymru yn unig

Mae Prif Weithredwr Cymdeithas Bêl-droed Cymru (CBDC) yn dweud nad oes ganddyn nhw unrhyw fwriad i fod yn rhan o gynlluniau i greu tîm Prydain ar gyfer y Gemau Olympaidd yn 2028.

Fe ddywedodd penaethiaid 'Team GB' ar ddiwedd y gemau ym Mharis y llynedd, y bydde nhw'n hoffi gweld tîm pêl-droed dynion yn cymryd rhan yn y gemau yn Los Angeles.

Roedd rheolwr Cymru, Craig Bellamy ymhlith pump o Gymry gafodd eu cynnwys yn y garfan y tro diwethaf i dîm dynion gystadlu yn y gemau 'nôl yn 2012.

Cafodd tîm merched ei greu diwethaf ar gyfer Gemau Tokyo yn 2020 - gyda chyn-gapten Cymru, Sophie Ingle yn rhan o'r garfan honno.

Ond mae Cymru, Yr Alban a Gogledd Iwerddon wedi dweud ers tro nad ydyn nhw'n gefnogol o'r syniad, a dydi hynny heb newid, yn ôl Noel Mooney.

Ar ôl Gemau Paris, fe ddywedodd Andy Anson - un o gyn-swyddogion Cymdeithas Olympaidd Prydain (BOA) - fod y corff yn gobeithio cynnal trafodaethau gyda chymdeithasau pêl-droed Lloegr, Yr Alban, Cymru a Gogledd Iwerddon.

Yn y gorffennol mae'r cymdeithasau unigol wedi mynegi pryder y gallai creu tîm o'r fath beryglu eu hannibyniaeth yng nghystadlaethau Fifa ac Uefa.

'Canolbwyntio ar Gymru'

"Does gennym ni ddim unrhyw fwriad i fod yn rhan o'r Gemau Olympaidd, dydi'r mater ddim ar ein radar o gwbl," meddai Mr Mooney wrth asiantaeth newyddion PA.

"Dydw i heb glywed gair am y peth, ac erioed wedi ei drafod gydag unrhyw un.

"Yr hyn 'da ni eisiau ei wneud yw canolbwyntio ar Gymru, a'r hyn gallwn ni ei wneud."

Mae 'na deimlad y gallai'r BOA wynebu gwrthwynebiad gan y cymdeithasau a chlybiau proffesiynol oherwydd pryderon am nifer y gemau yn y calendr pêl-droed.

Fe fydd Gemau Los Angeles yn cael eu cynnal rhwng 14-30 Gorffennaf, 2028 - ddyddiau yn unig ar ôl i Euro 2028, sy'n cael ei gynnal yn y DU, ddod i ben.

Ychwanegodd Mr Mooney: "Gwaith rhywun arall ydi'r Gemau Olympaidd, ein cyfrifoldeb ni yw sicrhau ein bod ni'n cynrychioli Cymru yn y ffordd iawn.

"Ar ac oddi ar y cae, rydyn ni'n gwneud yn siŵr ein bod ni'n cynrychioli Cymru yn y ffordd iawn. Dyna yw ein ffocws."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.