Cyngres UEFA: Y Seintiau Newydd gam yn nes at y grwpiau

Danny Davies sgoriodd y gôl gyntaf i'r Seintiau

Mae'r Seintiau Newydd gam yn nes at gyrraedd grwpiau Cyngres UEFA wedi buddugoliaeth wych o 0-3 yn erbyn FK Panevėžys yn y gemau ail gyfle.

Pe bai'r Seintiau yn trechu pencampwyr Lithwania dros ddau gymal, nhw fyddai'r tîm cyntaf o Gymru i gyrraedd grwpiau un o brif gystadlaethau Ewrop erioed.

Yn ystod hanner cyntaf digon difflach prin iawn oedd y cyfleoedd o safon i'r ddau dîm, ond y Cymry oedd yn rheoli'r chwarae ar y cyfan.

Saith munud wedi'r egwyl, fe aeth yr ymwelwyr ar y blaen diolch i gôl Danny Davies - ei ail yn Ewrop y tymor hwn.

Fe wyrodd y bel oddi ar Davies ger y postyn pellaf ar ôl i gic gornel achosi bob math o broblemau i amddiffyn Panevėžys.

Bydd yr ail gymal yn cael ei chwarae yn Neuadd y Parc nos Iau 29 Awst

Fe ddisgynnodd Y Seintiau i'r gystadleuaeth hon ar ôl colli i bencampwyr Hwngari, Ferencvaros yn ail rownd ragbrofol Cynghrair y Pencampwyr, ac yna i Petrocub o Moldofa yn nhrydedd rownd rhagbrofol Cynghrair Europa.

Ond roedd yr hyder yn llifo ar ôl iddyn nhw fynd ar y blaen, a daeth ail gôl wedi 64 o funudau wedi gwaith ardderchog gan Dan Williams.

Fe wnaeth yr asgellwr dwyllo dau o amddiffynwyr y tîm cartref ar yr asgell dde, troi yn sydyn tuag at ymyl y cwrt cosbi a chrymanu'r bêl i gornel isa'r postyn pellaf.

Daeth y drydedd gôl yn yr eiliadau gan yr eilydd Ben Clark.

Mae'r fuddugoliaeth yn golygu fod gan y Seintiau fantais wirioneddol cyn yr ail gymal yn Neuadd y Parc yng Nghroesoswallt ar nos Iau 29 Awst.