Cyn-asgellwr Abertawe a Chymru, Terry Medwin, wedi marw
![Terry Medwin](https://ichef.bbci.co.uk/ace/standard/1024/cpsprodpb/6064/live/01a2ff80-07b1-11ef-bee9-6125e244a4cd.jpg)
- Cyhoeddwyd
Mae cyn-asgellwr Abertawe, Cymru a Tottenham Hotspur, Terry Medwin, wedi marw yn 91 oed.
Yn enedigol o Abertawe, fe chwaraeodd Medwin 30 gwaith i Gymru, ac fe sgoriodd y gôl fuddugol yn y fuddugoliaeth yn erbyn Hwngari o 2-1 yng Nghwpan y Byd 1958 yn Sweden.
Y gôl honno yn Stadiwm Rasunda yn Solna ydy un o'r goliau pwysicaf yn hanes tîm Cymru.
Fe arweiniodd y fuddugoliaeth at le yn rownd yr wyth olaf yn erbyn Brasil.
Yn 2014, dywedodd Medwin: "Roedd yn amser pell yn ôl, a dyna'r unig dro i ni gyrraedd rowndiau terfynol Cwpan y Byd, ond nawn ni fyth anghofio hynny.
"Roedd yn brofiad arbennig chwarae dros Gymru pan nes i ennill fy nghap cyntaf, ond roedd hyd yn oed yn well pan aethon ni i rownd yr wyth ola yng Nghwpan y Byd."
- Cyhoeddwyd26 Chwefror 2024
- Cyhoeddwyd23 Tachwedd 2021
- Cyhoeddwyd31 Mai 2019
![Terry Medwin](https://ichef.bbci.co.uk/ace/standard/3840/cpsprodpb/a4bb/live/35e26510-07b1-11ef-8db5-a5411cf57745.jpg)
Roedd Terry Medwin yn rhan o garfan Tottenham Hotspur pan enillon nhw'r gynghrair a Chwpan yr FA yn 1961
Fe chwaraeodd ei gêm gyntaf i Abertawe yn 1949 ac roedd yn chwaraewr allweddol i'r clwb, cyn iddo symud i Tottenham yn 1956 am £25,000.
Roedd yn chwarae i Spurs pan enillon nhw'r gynghrair a Chwpan yr FA yr un flwyddyn yn 1961, a Chwpan yr FA eto ddwy flynedd yn ddiweddarach.
Fe ddaeth ei yrfa fel pêl-droediwr i ben pan dorrodd ei goes tra'n chwarae i Spurs yn 1963.
Ar ôl ymddeol fel chwaraewr, bu'n hyfforddi yn Fulham a bu'n hyfforddwr cynorthwyol i John Toshack yn Abertawe ddiwedd y 70au a ddechrau'r 80au.
Roedd yn westai anrhydeddus wrth i garfan Cymru gael ei chyhoeddi ar gyfer Cwpan y Byd yn 2022.