Diolch i'r Wal Goch, 'ein llysgenhadon gorau ni' wedi gêm Liechtenstein

Dau berson yn sefyll mewn cae o flaen ffens gyda 3 buwch tu ôl iddyn nhw. Mae'r ddau gyda braich rownd ei gilydd wrth iddyn nhw gymryd llun. Ar y dde mae yna ddyn sy'n dal ei ffon lan gyda'i fraich chwith i gymryd y llun. Mae'n gwisgo het goch, felyn a gwyrdd gyda bathodyn tîm pêl-droed Cymru ar y blaen. Mae'n gwisgo crys-t'r tîm pêl-droed sy'n goch a siaced y tîm pêl-droed sydd eto'n goch. I'w dde mae yna fenyw sy'n gwisgo het wen gyda chalonnau coch arni. Mae hi hefyd yn gwisgo crys-t coch tîm pêl-droed Cymru a siaced wyrdd.Reuters

Y gred ydy bod tua 3,000 o gefnogwyr Cymru wedi teithio i Liechtenstein ar gyfer y gêm

Mae Cymdeithas Bêl-droed Liechtenstein wedi canmol ymddygiad cefnogwyr Cymru yn dilyn y gêm rhwng y ddwy wlad ar 15 Tachwedd, yn ôl Prif Weithredwr Cymdeithas Bêl-droed Cymru.

Mewn neges ar blatfform X dywedodd Noel Mooney ei fod wedi derbyn "neges hyfryd" gan Gymdeithas Bêl-droed Liechtenstein oedd yn rhannu eu "gwerthfawrogiad diffuant" ynghylch ymddygiad cefnogwyr Cymru.

Yn ôl Mooney dywedodd cymdeithas Liechtenstein eu bod wedi derbyn "sawl adroddiad cadarnhaol" am ymddygiad y cefnogwyr, gan gynnwys yr heddlu.

Diolchodd i "bawb yn Y Wal Goch, ein llysgenhadon gorau ni".

Cymru enillodd y gêm yn rowndiau rhagbrofol Cwpan y Byd o 1-0, gyda Jordan James yn sgorio ei gôl ryngwladol gyntaf i sicrhau'r canlyniad oddi cartref.

Roedd yn ganlyniad hollbwysig gan gadw gobeithion y tîm cenedlaethol o orffen yn y ddwy safle uchaf yn fyw.

Aeth Cymru ymlaen i drechu Gogledd Macedonia tridiau'n ddiweddarach, gan orffen yn ail eu grŵp rhagbrofol ar gyfer Cwpan y Byd 2026.

Grŵp o ddynion yn dal baner Cymru ac yn gwenu ar y camera. Maen nhw'n sefyll ar heol gydag adeilad gwyn ar ben bryn tu ôl iddyn nhw. Mae pump ohonyn nhw'n gwisgo crys-t coch tîm pêl-droed Cymru. Mae'r llall yn gwisgo siwmper lwyd.Reuters

Dywedodd Cymdeithas Bêl-droed Liechtenstein ei bod nhw wedi derbyn 'adroddiadau cadarnhaol ynghylch ymddygiad y cefnogwyr'

Bydd Cymru yn wynebu Bosnia a Herzegovina gartref yn rownd gynderfynol y gemau ail gyfle i gyrraedd Cwpan y Byd 2026.

Fe fydd carfan Craig Bellamy yn croesawu Bosnia a Herzegovina i Stadiwm Dinas Caerdydd ar nos Iau, 26 Mawrth 2026.

Os ydyn nhw'n llwyddo i ennill y gêm honno, bydd Cymru wedyn yn chwarae yn erbyn yr enillydd rhwng Yr Eidal a Gogledd Iwerddon yn Stadiwm Dinas Caerdydd.

Bydd rownd derfynol y gemau ail gyfle yn cael ei gynnal ar nos Fawrth, 31 Mawrth.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig