Cefnogwyr Cymru'n dathlu creu hanes er gwaetha'r golled i Ffrainc

Er i Gymru golli i Ffrainc yn eu hail gêm yn Euro 2025, mae aelodau o'r wal goch yn mynnu bod digon o reswm i ddathlu.

4-1 i Ffrainc oedd hi yn St Gallen nos Fercher, ond mae'r foment pan sgoriodd Jess Fishlock gôl gyntaf Cymru mewn pencampwriaeth ryngwladol wedi cael ei ddisgrifio fel "breuddwyd".

Dywedodd cefnogwyr eraill a wyliodd y gêm mewn digwyddiad yng Nghasnewydd fod chwaraewyr Cymru wedi "dangos digon o galon" a'u bod wedi "brwydro nes y diwedd".

Roedd sylwadau'r chwaraewyr a'r rheolwr yn llawer mwy cadarnhaol hefyd, gyda Rhian Wilkinson yn dweud ei bod yn falch iawn o "ddewrder" y garfan yn erbyn un o dimau gorau'r byd.

Roedd y wal goch yn amlwg o amgylch St Gallen cyn ac ar ôl y gêm nos Fercher

Fe siaradodd BBC Cymru â rhai cefnogwyr oedd yn gadael y stadiwm wedi'r chwiban olaf - gyda'r rhan fwyaf yn canolbwyntio ar yr elfennau cadarnhaol.

Dywedodd Haf, 18, o Gaerfyrddin: "Roedd yr hanner cyntaf yn rili da, collon ni'r ail hanner ond wnaethon ni chwarae'n dda.

"Roedd o'n well na be o'n i wedi ei ddisgwyl, ac o'n i'n dathlu gôl Fishlock - oedd o'n amazing chwarae teg iddi hi.

"Mae lot o obaith 'da fi am y Cymry, maen nhw'n neud yn dda."

Roedd perfformiad y merched yn "ardderchog," yn ôl Danielle o Gaerdydd

Dywedodd Danielle o Gaerdydd "nad oedd hi'n disgwyl i'r genod chwarae mor dda".

"Roedd yn gêm arbennig. Wrth gwrs doedd y sgôr ddim cweit beth o'n i'n meddwl ond wnaeth y merched yn ardderchog," meddai.

Dywedodd ei bod wedi cyfarfod teulu Jess Fishlock yn y stadiwm yn ystod y gêm a bod gweld y gôl yn fyw yn brofiad "arbennig".

Roedd gôl Jess Fishlock yn "freuddwyd arbennig," meddai Tarian

Roedd yr awyrgylch yn St Gallen yn "arbennig", meddai Tarian, 18, o Rydaman.

"Pan oedd unrhyw beth bach yn digwydd oedd e mor wych i weld," meddai.

"Roedd Yma o Hyd yn chwarae pob eiliad, non-stop - roedd o mor hwyl."

Dywedodd fod gwylio gôl Jess Fishlock fel "breuddwyd arbennig yn fy mhen",

"Y tîm yma, maen nhw'n dal i fy synnu gyda'u dewrder a'u parodrwydd i chwarae," meddai Rhian Wilkinson

Mewn cyfweliad gydag ITV wedi'r gêm, dywedodd rheolwr Cymru Rhian Wilkinson nad oedd hi "erioed wedi bod mor falch o'r tîm".

"Y tîm yma, maen nhw'n dal i fy synnu gyda'u dewrder a'u parodrwydd i chwarae," meddai.

"I fod mor ddewr â hynny, a chwarae fel hyn yn erbyn un o dimau gorau'r byd... ac i sgorio ein gôl gyntaf yn yr Euros - mae'n anhygoel.

"Dwi'n ofnadwy o falch heddiw... Do, fe wnaethon ni golli 4-1 ond dim y canlyniad yw'r peth mawr bob tro.

"Rydyn ni'n wlad newydd ar y lefel yma, ac rydyn ni wedi dangos i bawb pa mor falch ydyn ni i gynrychioli Cymru."

'Wnaethon ni adael popeth ar y cae'

Yn siarad wedi'r gêm, dywedodd capten Cymru, Angharad James ei bod hi'n "falch o'r perfformiad".

"Wnaethon ni adael popeth allan ar y cae heno," meddai.

"I sgorio'r gôl gyntaf yn yr Euros, mae'n deimlad gwych. Ni'n siomedig am y ffordd wnaethon ni roi'r goliau iddyn nhw ond oedd y perfformiad gymaint gwell.

"Mae'r teimlad yn un gwahanol i'r gêm gyntaf."

Ychwanegodd: "Dwi mor hapus i [Jess], moment hi oedd e. Mae hi wedi gweithio mor galed fel unigolyn dros yr 20 mlynedd diwethaf a dwi mor hapus iddi hi."

Dywedodd Carrie Jones ei bod hi'n teimlo "cymysgedd o emosiynau" wedi'r gêm.

"Wrth gwrs ein bod ni'n siomedig gyda'r canlyniad ond mae heddiw tipyn bach yn wahanol achos ni wedi ysbrydoli llawer o bobl yng Nghymru."

Roedd Alisha, 18, ac Oliver, 19, yn gwylio'r gêm mewn digwyddiad yng Nghasnewydd

Nôl adref yng Nghymru roedd nifer o gefnogwyr yn gwylio'r gêm mewn digwyddiadau gwahanol ar hyd y wlad, gan gynnwys Alisha ac Oliver wnaeth ddilyn y cyfan mewn clwb chwaraeon yng Nghasnewydd.

"Dwi'n meddwl ein bod ni wedi brwydro'n dda, ond pan sgorion nhw'n drydedd dwi'n meddwl fod pennau pawb lawr ac roedd mwy o gamgymeriadau yn cael eu gwneud," meddai Oliver, 19.

"Be sydd angen i ni ei wneud rŵan ydi cadw ein pennau'n uchel, a deall ein bod ni'n gallu perfformio ar y llwyfan rhyngwladol, a'n bod ni'n haeddu bod yma."

Ychwanegodd Alisha, 18: "Mi wnes i fwynhau yn fawr, er ein bod ni wedi colli.

"Fe wnawn ni ddysgu o'r hyn ddigwyddodd, a gobeithio byddwn ni'n gallu taro 'nôl."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.