Beth sydd ar Radio Cymru dros y Dolig?

Dros y bythefnos nesaf bydd rhaglenni radio a theledu arbennig yn cael eu darlledu i nodi'r Nadolig a'r flwyddyn newydd.

Mae hyn yn wir o'n gorsaf radio cenedlaethol hefyd. Felly, beth yw'r arlwy gan Radio Cymru dros yr ŵyl?

Dyma chi flas o ambell uchafbwynt:

Ar Blât

Mae rhai'n bwyta i fyw ac eraill yn byw i fwyta. Roedd Beca Lyne-Pirkis wedi cael cwmni Emyr Wyn a Llinor ap Gwynedd yn y gyntaf o gyfres Ar Blât y Dolig hwn, ar 15 Rhagfyr. Beth yw'r cof cyntaf am fwyd neu brofiadau plentyndod am brydau bwyd? Beth fwytawyd ar ddêt cyntaf a beth yw'r swper cysur delfrydol? Gwrandewch yn ôl ar BBC Sounds.

Yn yr ail raglen, ar 22 Rhagfyr, Lisa Angharad a'i phartner Rhys Gwynfor fydd rownd y bwrdd yn hel atgofion a rhannu cyfrinachau am ryseitiau'r cartref ac ambell i bleser euog!

Beca Lyne-Pirkis gyda Rhys Gwynfor a Lisa Angharad

Bore Cothi

Dydd Mercher, 18 Rhagfyr, bydd Bore Cothi yn darlledu o siop Pethau Olyv yn Sanclêr yng nghwmni perchnogion y siop Olive ac Yvonne a'u ffrindiau. Bydd Trystan Llŷr Griffiths yn galw heibio am sgwrs a chân hefyd.

Dydd Llun a Mawrth (20 a 21 Rhagfyr) bydd Rhys Taylor a'r band yn y stiwdio i chwarae cerddoriaeth Nadoligaidd ac mi fydd ambell westai arbennig yn galw mewn.

Ffion Dafis

Mewn rhaglen ar 22 Rhagfyr mae Ffion Dafis yng nghwmni gwesteion arbennig, Maureen a John Ogwen.

Bydd dau o gewri byd y Theatr Gymraeg yn gwmni i Ffion mewn rhaglen arbennig a recordiwyd o flaen cynulleidfa fyw yn y Llyfrgell Genedlaethol. Yn yr awr gyntaf cawn ddilyn y ddau yn bodio archif y Llyfrgell gan hel atgofion am gynyrchiadau llwyfan a theledu.

Ymysg y trysorau mae sgriptiau Gwenlyn Parry a rhaglenni nosweithiau adloniant. Cawn wrando ar y ddau yn trin a thrafod gyrfaoedd unigryw sydd yn pontio cyfrwng a chyfnod.

Ffion Dafis yng nghwmni John Ogwen a'i wraig, Maureen Rhys

Beti a'i Phobol

Ar 22 Rhagfyr yr actores Lisabeth Miles sydd ym sgwrsio â Beti George. Mae Lisabeth yn enwog wrth gwrs am chwarae rhan Megan Harries ar y gyfres Pobol y Cwm ar S4C.

Talwrn Nadolig

Ar 22 Rhagfyr hefyd y bydd Talwrn y Nadolig 2024 yn cael ei darlledu (ailddarllediad 25 Rhagfyr).

Mae Talwrn y Nadolig yn dod o Festri Capel Disgwylfa, Gaerwen. Y timau sy'n cymryd rhan yw'r Asynnod a'r Camelod, a Ceri Wyn Jones yn cadw trefn arnyn nhw.

Yr Asynnod - Iwan Rhys, Huw Meirion Edwards, Grug Muse, Mair Tomos Ifans, Annes Glynn

Y Camelod - Llŷr Gwyn Lewis, Carwyn Eckley, Ioan Roberts, Gwenan Prysor, Tegwen Bruce-Deans

Y beirdd sy'n cymryd rhan yn Talwrn y Nadolig

Aled Hughes

Bydd rhaglen fyw gan Aled Hughes ar ddiwrnod Nadolig. Bydd Aled yn darlledu rhwng 8 a 11 y bore, gyda rhaglen llawn cerddoriaeth Nadoligaidd.

Mae'n rhaglen fyw, felly bydd croeso cynnes i chi anfon eich cyfarchion Nadoligaidd at deulu neu ffrindiau ar y diwrnod arbennig!

Bydd Aled yn sgwrsio gyda Sara o dafarn y Llew Coch yn Llansannan wedi ymweliad Siôn Corn, a bydd cyfarchion gan gyflwynwyr Radio Cymru.

Galwodd Aled heibio'r Llew Coch yn Llansannan yn ystod ei daith gerdded i Plant mewn Angen

Elin Fflur

Bydd rhaglen Elin Fflur yn cael ei darlledu am hanner dydd ar ddiwrnod Dolig.

Dwy awr o hwyl gerddorol yng nghwmni Mynediad am Ddim, Alys Williams ac Osian Huw o'r Candelas.

Tudur Owen

Bydd digon o hwyl gyda Tudur Owen a'r criw am 3 brynhawn dydd Dolig.

Yn ogystal â digon o chwerthin bydd yna gerddoriaeth ar gyfer y parti Nadolig perffaith.

Caryl

Rhwng 9 a 12 yr hwyr ar ddiwrnod Dolig bydd Caryl yn rhannu ei hoff garolau a chaneuon Nadoligaidd, ac yn cael cwmni'r seren Bronwen Lewis fydd yn perfformio set fyw.

Goreuon y Gerddorfa

Ar Ŵyl San Steffan bydd Goreuon y Gerddorfa yn cael ei ddarlledu - bydd hwn hefyd ar gael ar BBC Sounds fel podlediad.

Lisa Gwilym sy'n cyflwyno uchafbwyntiau o nosweithiau bythgofiadwy Radio Cymru a Cherddorfa Genedlaethol Gymreig y BBC.

O gyngherddau Eden i Carwyn Ellis, Elin Fflur i Alys Williams, nodi Sain yn 50 i raglenni'n dathlu'r grefft o ganu cerdd dant a'r plygain, mae prosiectau Radio Cymru ar y cyd â'r Gerddorfa wedi creu eiliadau cwbl hudolus, ac yn y rhaglen yma fe glywn yr uchafbwyntiau, sydd hefyd yn cynnwys recordiadau arbennig gan enillwyr Albwm Cymraeg Y Flwyddyn gyda'r Gerddorfa, a phrosiectau cerddorfaol gan rai o aelodau Super Furry Animals a'r Gorkys!

Lisa Gwilym sy'n cyflwyno Goreuon y Gerddorfa