Llafur am weld yr heddlu'n 'gwrando ar gymunedau'

Bydd yr etholiadau ar gyfer Comisiynwyr yr Heddlu a Throsedd Cymru yn cael eu cynnal ar 2 Mai

Mae'n rhaid i'r heddlu wrando ar y cymunedau maen nhw'n eu gwasanaethu a gwneud mwy i fynd i'r afael ag ymddygiad gwrthgymdeithasol, yn ôl Aelod Seneddol Llafur o Gymru.

Dywedodd y cyn-Weinidog Cabinet, Nia Griffith, bod y cyhoedd am weld "plismona gweledol iawn", gyda swyddogion "allan yn y gymuned".

Nododd Ms Griffith hefyd fod angen i heddluoedd ganolbwyntio ar leihau achosion o ddwyn o siopau a thrais yn y cartref.

Daw ei sylwadau ar drothwy'r etholiadau ar gyfer Comisiynwyr yr Heddlu a Throsedd Cymru, fydd yn cael eu cynnal ddydd Iau.

Er nad yw Comisiynwyr Heddlu a Throsedd yn gyfrifol am benderfyniadau ynglŷn â gwaith dydd i ddydd yr heddlu, maen nhw'n gosod blaenoriaethau a chyllideb flynyddol ar gyfer pob ardal.

Yng Nghymru mae pedwar Comisiynydd, un ar gyfer pob ardal blismona - De Cymru, Gwent, Dyfed-Powys, a Gogledd Cymru.

Mae'r prif bleidiau yng Nghymru - Llafur, y Ceidwadwyr, Plaid Cymru a'r Democratiaid Rhyddfrydol - i gyd yn cynnig ymgeiswyr ym mhob ardal.

Ar hyn o bryd ymgeiswyr Llafur sydd yn gomisiynwyr yng Ngwent, Gogledd Cymru a De Cymru, tra bod ymgeisydd Plaid Cymru yn gomisiynydd yn Nyfed Powys.

Dywedodd Ms Griffith, yr Aelod Seneddol dros Lanelli, fod pobl yn awyddus i weld mwy o swyddogion heddlu ar ein strydoedd.

"Yr hyn mae pobl eisiau ei weld yw plismona gweledol iawn. Hynny yw, maen nhw eisiau gweld swyddogion allan yng nghanol ein cymunedau."

Awgrymodd y byddai Llafur, pe bydden nhw'n ffurfio'r llywodraeth nesaf yn San Steffan, yn ariannu cynlluniau i gael 13,000 o swyddogion ychwanegol yng Nghymru a Lloegr.

"Yn y cyfamser, yr hyn sy'n bwysig yw bod blaenoriaethau comisiynwyr yn adlewyrchu blaenoriaethau ein cymunedau," meddai.

"Mae'r rhain yn cynnwys mynd i'r afael â phethau fel ymddygiad gwrthgymdeithasol, a thaclo materion fel trais yn y cartref."

Mae'n rhaid sicrhau fod pobl yn barod i adrodd eu pryderon i'r heddlu, meddai Nia Griffith

Ychwanegodd Ms Griffith ei bod hi'n poeni nad yw rhai achosion o drais yn y cartref yn cael eu trin fel rhai difrifol.

"Ry'n ni'n clywed ystadegau ofnadwy bob wythnos am faint o ferched sy'n cael eu lladd ac ati, felly mae'n rhaid i ni leihau nifer yr achosion yn ogystal â sicrhau ein bod ni'n gwrando ar y rhai sy'n adrodd y troseddau difrifol yma.

"Mae modd i'n comisiynwyr ni osod y dôn o ran sut y mae mynd ati i ddelio â throseddau fel hyn.

"Os nad yw pobl yn teimlo fod pobl yn mynd i wrando ar eu pryderon, yna maen nhw'n llai tebygol o'u hadrodd.

"Felly mae hi'n bwysig fod pobl yn teimlo y bydd eu pryderon yn cael eu trin fel mater o flaenoriaeth."

Ychwanegodd: "Ry'n ni gyd yn gwybod sut y mae materion llai yn gallu troi i fod yn broblem fwy, ac mae'n rhaid trin bob achos fel mater difrifol."

Pwy sy'n sefyll y tro hwn?

Dyfed-Powys

• Justin Griffiths, Democratiaid Rhyddfrydol Cymru

• Ian Harrison, Ceidwadwyr Cymreig

• Dafydd Llywelyn, Plaid Cymru

• Philippa Ann Thompson, Llafur Cymru

Gwent

• Donna Cushing, Plaid Cymru

• Mike Hamilton, Democratiaid Rhyddfrydol Cymru

• Hannah Jarvis, Ceidwadwyr Cymreig

• Jane Mudd, Llafur Cymru

Gogledd Cymru

• Andy Dunbobbin, Llafur Cymru

• Ann Griffith, Plaid Cymru

• Brian Jones, Ceidwadwyr Cymreig

• David Richard Marbrow, Democratiaid Rhyddfrydol Cymru

De Cymru

• Sam Bennett, Democratiaid Rhyddfrydol Cymru

• George Carroll, Ceidwadwyr Cymreig

• Dennis Clarke, Plaid Cymru

• Emma Wools, Llafur Cymru