Callender yn ôl i Gymru i herio Iwerddon yn y Chwe Gwlad

Mae Alex Callender yn dychwelyd i'r tîm i herio Iwerddon

Mae Alex Callender yn dychwelyd i Gymru wrth iddyn nhw baratoi i wynebu Iwerddon ym Mhencampwriaeth y Chwe Gwlad ddydd Sul.

Mae'r chwaraewr rheng-ôl wedi bod yn un o sêr y tîm mewn blynyddoedd diweddar, ond dydy hi ddim wedi chwarae yn y bencampwriaeth eto eleni yn dilyn anaf.

Wrth i Gymru chwilio am eu buddugoliaeth gyntaf yn 2025, mae'r hyfforddwr Sean Lynn wedi symud Georgia Evans i'r ail reng, a dewis Kelsey Jones yn lle Carys Phillips fel bachwr.

Kayleigh Powell fydd yn dechrau fel maswr, ac mae Lleucu George yn ôl ar y fainc.

Mae Cymru ar waelod y tabl yn dilyn colledion yn erbyn Yr Alban, Lloegr a Ffrainc.

Mae Iwerddon yn drydydd ar ôl curo Yr Eidal.

Cyn y gêm yn Rodney Parade, dywedodd Lynn bod angen "dal i adeiladu ein perfformiadau a chanolbwyntio ar wella ein steil o chwarae a'r hyn rydyn ni eisiau bod fel carfan".

Cymru: Jasmine Joyce; Lisa Neumann, Hannah Jones (c), Courtney Keight, Carys Cox; Kayleigh Powell, Keira Bevan; Gwenllian Pyrs, Kelsey Jones, Jenni Scoble, Abbie Fleming, Georgia Evans, Kate Williams, Bethan Lewis, Alex Callender.

Eilyddion: Carys Phillips, Maisie Davies, Donna Rose, Natalia John, Alaw Pyrs, Sian Jones, Lleucu George, Catherine Richards.