Barbara Roberts o Aberaeron yn derbyn Tlws Coffa Aled Roberts

Dysgodd Barbara Roberts y Gymraeg fel oedolyn, ac ers 10 mlynedd mae wedi bod yn cefnogi dysgwyr eraill

Barbara Roberts o Aberaeron sy'n derbyn Tlws Coffa Aled Roberts eleni.

Mae'r tlws yn cael ei gyflwyno gan y Ganolfan Dysgu Cymraeg Genedlaethol er cof am Aled Roberts - y gwleidydd a chyn-Gomisiynydd y Gymraeg a oedd yn wreiddiol o Rosllannerchrugog.

Mae'n cael ei roi yn flynyddol i unigolyn sydd wedi gwneud cyfraniad gwirfoddol nodedig i'r sector Dysgu Cymraeg.

Dysgodd Barbara y Gymraeg fel oedolyn, ac ers 10 mlynedd mae wedi bod yn cefnogi dysgwyr eraill.

Mae'n trefnu llu o weithgareddau yn ei hardal, mae'n siaradwr gwadd poblogaidd ac yn cadeirio Cymdeithas Ceredigion.

Mae Barbara hefyd yn trefnu grŵp siarad yn Llanerchaeron, yn mynychu sesiynau coffi a chlonc yn Aberaeron ac yn arwain teithiau tywys o amgylch yr ardaloedd hynny.

Mae'n gefnogwr brwd o gynllun 'Siarad' y Ganolfan Dysgu Cymraeg - cynllun sy'n paru siaradwyr Cymraeg â dysgwyr er mwyn rhoi cyfle iddyn nhw sgwrsio a chymdeithasu yn Gymraeg tu allan i'r dosbarth.

Mae gan Barbara ddiddordeb mawr mewn llenyddiaeth, ac mae'n aelod selog o glwb darllen Rhannu Geiriau a grŵp Gwibio, sy'n trafod llenyddiaeth Gymraeg.

'Gweithio'n ddiflino i helpu eraill'

Dywedodd prif weithredwr y Ganolfan Dysgu Cymraeg Genedlaethol, Dona Lewis: "Mae'n amlwg bod Barbara yn aelod gwerthfawr o'r gymuned Gymraeg yn ardal Aberaeron, ac mae pawb yn dweud ei bod wastad yn barod ei chymwynas mewn cymaint o feysydd.

"Mae'n angerddol dros y Gymraeg ac yn croesawu a chefnogi dysgwyr a siaradwyr Cymraeg i fwynhau llu o weithgareddau a sesiynau difyr y mae hi'n eu trefnu.

"Mae gwaith ardderchog yn cael ei wneud gan wirfoddolwyr ar hyd a lled y wlad i gefnogi dysgwyr, ac mae Barbara yn enghraifft berffaith o rywun sy'n gweithio'n ddiflino yn y gymuned i helpu eraill i fwynhau dysgu a siarad Cymraeg.

"Diolch enfawr, Barbara, am eich holl waith."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.