'Sefydlu côr heddlu er lles iechyd a iaith'

Cafodd y côr newydd sbon ei sefydlu ym mis Awst eleni

Mae sefydlu côr heddlu cyntaf Cymru wedi bod yn "fuddiol i feddwlgarwch, iechyd meddwl ac iechyd corfforol" yn ôl yr is-arweinydd, Arwyn Tudur Jones.

Côr Heddlu Gogledd Cymru yw'r cyntaf o'i fath yng Nghymru, yn ôl y swyddog.

Sefydlwyd ym mis Awst eleni - a bellach mae ganddyn nhw 80 o aelodau.

Dywed Mr Jones fod sefydlu’r côr wedi rhoi cyfle i'r aelodau ymlacio ac anghofio am bwysau dyddiol y gwaith.

Yn siarad ar y Post Prynhawn ar BBC Radio Cymru, dywedodd mai "canu yw'r feddyginiaeth orau".

Mae'r côr wedi cymryd rhan mewn digwyddiadau diweddar i gynulleidfaoedd o gannoedd

Mae Arwyn Tudur Jones yn gweithio fel rhingyll ymatebol a thrafodwr gwystl gyda Heddlu Gogledd Cymru.

Mae'n deall yn union y pwysau sy'n dod gyda gweithio yn yr heddlu.

"Fel rhan o'r heddlu mae rhan fwyaf ohonom ni yn mynd allan i drychinebau dyle neb ei weld," meddai.

"Mae hynny'n gallu cael effaith reit ddwys ar y meddwl.

"Dydy o ddim yn hawdd iawn i rywun fynd adref ac anghofio am beth maen nhw wedi gweld yn ystod y dydd."

Trwy sefydlu côr yr heddlu, y gobaith oedd creu dihangfa i'w aelodau.

"Mae hwn yn gyfle i ni fedru ymlacio ac mae'n gyfle i ni ddod at ein gilydd i rannu rhywbeth sy'n agos at ein calonnau."

Pan ddechreuodd y côr roedd Mr Jones yn "ansicr iawn" am faint o ddiddordeb fyddai gan bobl.

Ond hyd yma mae ganddyn nhw 80 o aelodau, er nad ydy canran mawr ohonyn nhw erioed wedi canu mewn côr o'r blaen.

Mae'r aelodau yn dod o bob rhan o ogledd Cymru - o Bwllheli i ochrau Wrecsam.

Maen nhw'n ymarfer yn y gampfa ym Mhencadlys yr Heddlu ym Mae Colwyn bob wythnos.

'Hyrwyddo’r iaith Gymraeg'

Yn ogystal â bod o fudd i les meddyliol yr aelodau, mae’r côr hefyd wedi darparu cyfleoedd i "hyrwyddo’r iaith Gymraeg", meddai Mr Jones.

"Mae canran fawr o'r côr yn hollol ddi-Gymraeg.

"Felly mae'n gyfle iddyn nhw ddysgu'r iaith a dod yn gyfforddus yn defnyddio'r iaith o ddydd i ddydd yn eu gweithle a gartref."

Mae'r côr yn gymysg ac yn agored i unrhyw aelodau neu gyn-aelodau o Heddlu Gogledd Cymru, a'r pianydd Annette Bryn Parry ydy'r cyfarwyddwr cerdd.

Maen nhw'n gobeithio cystadlu yn yr Eisteddfod Genedlaethol yn Wrecsam y flwyddyn nesaf.