Ffordd yn y gogledd sydd ar gau ers blynyddoedd i ailagor

Mae'r B5605 yn cysylltu pentrefi Newbridge a Pentre yn Sir Wrecsam

Mae disgwyl i ffordd sydd wedi bod ar gau am dros bedair blynedd a hanner, ar ôl disgyn mewn tywydd garw, ailagor ddydd Sadwrn.

Cafodd ffordd y B5605 yn Newbridge, Sir Wrecsam, ei chau ym mis Ionawr 2021 ar ôl Storm Christoph - pan ddisgynnodd rhan o'r ffordd a llithro i lawr llethr.

Mae'n cysylltu pentrefi Newbridge a Pentre, ac yn ehangach mae'n cysylltu'r Waun a Chefn Mawr

Mewn datganiad, dywedodd Cyngor Wrecsam eu bod wedi gweithio'n drylwyr a manwl gyda pheirianwyr o gwmni Jones Bros i drwsio'r llwybr, gan ailagor "cyswllt pwysig rhwng y cymunedau".

Dywedodd busnesau fod cau'r ffordd wedi gadael effaith, gan eu bod wedi colli masnach oedd yn teithio heibio.

Dywedodd ysgol gynradd Gymraeg Min y Ddôl yng Nghefn Mawr eu bod wedi colli disgyblion oherwydd y dargyfeiriad naw milltir roedd yn rhaid gwneud i'w gyrraedd.

Cafodd y cyngor £2.8m gan Lywodraeth Cymru ym mis Mai 2022, i drwsio'r ffordd.

Yn ôl y cyngor, roedd y gwaith adfer yn "fawr a chymhleth".

"Pan fyddwch chi'n gyrru ar hyd y ffordd, mae popeth yn edrych yn debyg iawn i'r hyn oedd yno o'r blaen ac mae'n anodd gweld maint ac ehangder y peiriannu sydd wedi digwydd," medd llefarydd.

"Ond o dan yr wyneb, mae yna lawer iawn o waith wedi digwydd, a pheirianneg gymhleth iawn."

Bydd y gwaith trwsio "rhagorol" yn sicrhau dyfodol hirdymor y ffordd, medd Frank Hemmings

Mae'r cynghorydd lleol, Frank Hemmings, yn croesawu ailagor y ffordd.

"Mae wedi bod yn bedair blynedd rwystredig, sydd wedi effeithio ar drigolion mewn sawl ffordd - o'r rhai sy'n mwynhau'r tawelwch, i'r mwyafrif sydd wedi gorfod gyrru o amgylch yr A483 gydag oedi hir yn aml, ar adegau prysur pob dydd."

Ychwanegodd Mr Hemmings y bydd y gwaith trwsio "rhagorol" yn sicrhau dyfodol hirdymor y ffordd.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.