Tocynnau bws £1 i bobl ifanc ledled Cymru

Bydd tocynnau sengl yn costio £1 a thocyn diwrnod cyfan yn costio £3 ar gyfer pobl rhwng 16 a 21

Bydd pobl ifanc yn gallu cael tocynnau bws am £1 ledled Cymru fel rhan o gynllun peilot i sicrhau prisiau rhatach.

O ddydd Llun ymlaen, bydd prisiau tocynnau sengl yn £1 a bydd tocyn diwrnod cyfan yn costio £3 i bawb rhwng 16 a 21 oed.

Bydd hyn yn cael ei ymestyn i blant pump i 15 oed o 3 Tachwedd.

Daw wrth i Aelodau Seneddol yn Lloegr alw am gael cynnig i bobl ifanc deithio am ddim, tra bod yr Alban wedi gwneud hynny i bobl rhwng pump a 21 oed ers 2022.

Dywedodd Gweinidog Trafnidiaeth Llywodraeth Cymru, Ken Skates, ei fod yn gobeithio y bydd y cynllun yn helpu pobl ifanc i "gael mynediad at addysg, hyfforddiant, cyflogaeth a hamdden".

Mae Ifan a Holly yn credu y gallai'r prisiau eu hannog i deithio ar y bws yn amlach

Dywedodd myfyriwr o Gaerdydd, Ifan Stoddart, sy'n 20 ond ddim yn defnyddio'r bws ar hyn o bryd, efallai y bydd y pris yn ei annog i ddechrau.

Dywedodd ei bod hi'n hynod bwysig cadw costau trafnidiaeth gyhoeddus mor isel â phosibl er mwyn annog pobl i fynd i'r ysgol a'r gwaith ac yn ôl yn hawdd.

Mae Holly Whale, 20, o Gaerwysg, yn mynd i'r brifysgol yng Nghaerdydd a dywedodd ei bod hi'n cerdded o amgylch y ddinas yn bennaf, ond byddai'r prisiau is yn galluogi mwy o gyfleoedd i bobl ifanc.

"Ni all llawer o bobl ifanc fforddio gyrru," meddai Holly, gan ychwanegu bod "trenau'n ddrud iawn".

Cytunodd y ddau fyfyriwr y byddai'r newid yn gwneud iddyn nhw feddwl ddwywaith cyn archebu tacsi hefyd.

Dywedodd Connie Dolloway ei bod "mor ddiolchgar am y cynllun"

Dywedodd Connie Dollowy, 17, o Gaerffili, sy'n ei hail flwyddyn yn astudio yng Ngholeg y Cymoedd ei bod "mor ddiolchgar i gael mynediad i'r cynllun".

"Dwi'n meddwl fod o'n syniad da oherwydd bod o'n gwneud trafnidiaeth gyhoeddus yn fwy fforddiadwy ar gyfer myfyrwyr," meddai.

"Mae'r cynllun yn helpu fi i deithio i goleg, i deithio i fy swydd rhan amser, ac ar draws Cymru."

"Mae tocynnau £1 am fod yn chwyldroadol i fyfyrwyr a phobl ifanc," meddai Alfie Warner

Dywedodd Alfie Warner, 18 oed ac o Bontypridd, fod y cynllun yn "beth da i fyfyrwyr achos mae'n galluogi nhw i ganolbwyntio mwy ar goleg".

"Dyddiau yma, mae'n rhaid i lawer o fyfyrwyr boeni am bethau ar wahân i'w hastudiaethau ac mae hyn yn cael gwared â'r pryder am deithio sy'n galluogi nhw i ganolbwyntio mwy ar goleg," meddai.

"Dwi'n defnyddio trafnidiaeth gyhoeddus yn aml oherwydd ei fod yn well i'r amgylchedd ac yn rhatach na ffyrdd eraill o deithio.

"Mae tocynnau £1 am fod yn chwyldroadol i fyfyrwyr a phobl ifanc ac yn enwedig ers y pandemig, mae'n bwysig bod pobl yn gallu mynd allan i gymdeithasu heb orfod poeni am y gost."

Mae trafnidiaeth fforddiadwy bob amser yn syniad da yn ôl Oliver Reaper

Mae Oliver Reaper, 24, yn byw yng Nghaerdydd, a does dim car ganddo ar hyn o bryd.

Felly, mae'n dibynnu ar drafnidiaeth gyhoeddus a dywedodd fod prisiau rhatach bob amser yn well iddo.

Dywedodd y byddai cael mynediad at drafnidiaeth fwy fforddiadwy wedi gwneud gwahaniaeth mawr iddo fel myfyriwr.

Ychwanegodd y byddai wedi gwneud gwahaniaeth mawr wrth deithio i mewn ac o gwmpas y ddinas ar gyllideb dynn.

I gael y prisiau rhatach bydd angen i'r rhai sy'n gymwys wneud cais am FyNgherdynTeithio trwy wefan Trafnidiaeth Cymru (TFW), gan gadarnhau eu hoedran.

Ni fydd unrhyw lwybrau ychwanegol yn cael eu hychwanegu ond bydd y tocynnau'n berthnasol i unrhyw deithiau sengl sy'n cychwyn yng Nghymru.

Bydd y gostyngiad ar gael tan fis Medi 2026.

Dywedodd Llywodraeth Cymru fod £15m yn cael ei ddarparu dros ddwy flwyddyn ariannol (2025-26 a 2026-27) i gefnogi prisiau tocynnau bws £1 i bobl 16 i 21 oed fel rhan o'r cytundeb cyllideb gyda Jane Dodds, arweinydd y Democratiaid Rhyddfrydol yng Nghymru.

Mae Gethin Wyn Jones yn gobeithio y bydd hyn yn arwain at fwy o bobl ifanc yn defnyddio bysiau ar draws y wlad

Yn ôl Trafnidiaeth Cymru maen nhw eisoes wedi derbyn dros 10,000 o geisiadau ar gyfer FyNgherdynTeithio.

Dywedodd Gethin Wyn Jones, Rheolwr Materion Cyhoeddus Trafnidiaeth Cymru eu bod am "gael pobl ifanc i ddefnyddio'r bws a chynnig ffordd fforddiadwy a chynaliadwy o deithio".

Ychwanegodd ei bod hi'n "hynod bwysig i Trafnidiaeth Cymru a Llywodraeth Cymru bod pobl ifanc yn cael mynediad at drafnidiaeth gyhoeddus a drwy gynnig y gost o £1 mae'n agor y drws i bobl ifanc deithio ar y bws drwy gydol y wlad".

"'Da ni'n gobeithio bydd yr apêl hirdymor yn un lle bydd pobl yn defnyddio trafnidiaeth gyhoeddus i deithio" a hynny yn y dinasoedd ac yng nghefn gwlad.

'Cynnig deniadol'

Dywedodd David Beer o'r corff gwarchod trafnidiaeth annibynnol Transport Focus fod y cynllun yn "gynnig deniadol" ond dywedodd fod defnyddwyr bysiau Cymru yn llai bodlon nag mewn mannau eraill ar y cyfan.

"Mae'n gyfnod pan rydyn ni eisiau annog pobl i adael mathau eraill o drafnidiaeth a mynd ar fysiau" meddai.

Ychwanegodd fod y corff gwarchod wedi cynnal arolwg boddhad cenedlaethol yng Nghymru, Lloegr a'r Alban a'u bod wedi canfod bod boddhad pobl ifanc â gwerth am arian ychydig yn is yng Nghymru o'i gymharu â mannau eraill.

Roedd yn canmol Llywodraeth Cymru am eu gwaith ar wasanaethau bysiau ond yn cydnabod fod gan lywodraethau ar draws y DU "flaenoriaethau gwahanol".

Dywedodd Ysgrifennydd y Cabinet dros Drafnidiaeth a Gogledd Cymru, Ken Skates: "Rwyf wrth fy modd yn lansio cynllun sy'n cynnig modd fforddiadwy i bobl ifanc deithio ar fws a'u helpu i gael mynediad at addysg, hyfforddiant, cyflogaeth a hamdden".

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.