Tom Lockyer yn barod i chwarae eto ar ôl ataliad ar y galon

Mae Tom Lockyer wedi ennill 16 cap i Gymru

Mae Tom Lockyer yn dweud ei fod yn barod i ailddechrau ei yrfa bêl-droed ar ôl dioddef ataliad ar y galon yn 2023.

Nid yw'r amddiffynnwr 30 oed wedi chwarae gêm gystadleuol ers y digwyddiad yn ystod gêm Luton Town yn Bournemouth ar 16 Rhagfyr 2023.

Roedd Lockyer wedi llewygu ar y cae saith mis ynghynt yn ystod rownd derfynol gemau ail gyfle'r Bencampwriaeth i Luton yn erbyn Coventry City yn Wembley.

Mae wedi wyneb oedi pellach i'w adferiad ar ôl iddo orfod cael dwy lawdriniaeth ar ei ffêr yn ystod y flwyddyn ddiwethaf.

"Mae wedi bod yn siwrne hir," meddai'r chwaraewr o Gaerdydd wrth bodlediad Feast of Football.

"Ond dwi'n falch iawn o ddweud fy mod wedi cael y golau gwyrdd i chwarae pêl-droed eto, felly mae hynny'n amlwg yn anhygoel - popeth rydw i wedi gweithio amdano ers iddo [yr ataliad ar y galon] ddigwydd.

"Mae popeth yn edrych yn dda felly dwi'n hapus iawn."

Tom Lockyer ar y cae gyda'i deulu ar ôl gêm Luton Town yn 2024

Nid oes gan Lockyer glwb ar ôl i'w gytundeb gyda Luton ddod i ben yr haf diwethaf.

Er hynny, mae Luton wedi gadael iddo ddefnyddio eu cyfleusterau a gweithio gyda'u staff meddygol wrth iddo geisio adennill ei ffitrwydd.

Mae Lockyer wedi chwarae 16 gwaith i Gymru, ac fe ddaeth ei gap diwethaf ym mis Tachwedd 2023 mewn gêm ragbrofol Euro 2024 yn erbyn Twrci.

Pan lewygodd Lockyer ar y cae fis Rhagfyr 2023 - dyna oedd yr eildro i hynny ddigwydd o fewn saith mis.

Mae meddygon wedi gosod teclyn ICD (implantable cardioverter-defibrillator) yn ei frest, sydd i fod i ailddechrau'r galon yn syth os oes digwyddiad tebyg yn y dyfodol.

Mae Lockyer bellach yn annog mwy o bobl i wneud hyfforddiant CPR, gan ddweud nad pawb fydd mewn sefyllfa mor ffodus ag yr oedd ef.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.