Gemau Olympaidd: Medal arian i Elinor Barker

Mae gan Barker bedair medal Olympaidd bellach

Mae'r seiclwr Elinor Barker wedi ennill medal arian yn y Gemau Olympaidd ym Mharis.

Llwyddodd Barker i gipio 10 pwynt yn y funud olaf i sicrhau'r ail safle iddi hi a Neah Evans yn y Madison.

Ond Yr Eidal, chwe phwynt o'u blaenau, aeth â'r aur yn y diwedd.

Bellach, mae gan Barker bedair medal Olympaidd - y nifer uchaf erioed i Gymraes.

Hefyd nos Wener fe lwyddodd Jeremiah Azu o Gaerdydd i sicrhau medal efydd fel rhan o dîm 4x100m dynion Prydain ar y trac rhedeg.