Steve Tandy yn cael ei enwi yn brif hyfforddwr nesaf rygbi Cymru

Mae cytundeb Steve Tandy yn parhau hyd at Gwpan Rygbi'r Byd 2027 yn Awstralia

Mae Undeb Rygbi Cymru (URC) wedi cyhoeddi mai cyn-hyfforddwr y Gweilch, Steve Tandy, fydd prif hyfforddwr nesaf tîm rygbi dynion Cymru.

Roedd URC yn chwilio am olynydd parhaol i Warren Gatland, ar ôl i Matt Sherratt gymryd y llyw dros dro yn ystod y Chwe Gwlad a'r daith i Japan dros yr haf.

Tandy oedd y ffefryn am y swydd wedi iddi ddod i'r amlwg ym mis Ebrill ei fod yn cael ei dargedu gan yr Undeb.

Dywedodd URC y byddai Tandy yn dechrau yn ei rôl ar 1 Medi ac yn arwain Cymru i Gwpan Rygbi'r Byd 2027 yn Awstralia.

'Braint enfawr'

Bydd Tandy yn etifeddu tîm sy'n 12 ar restr detholion y byd ac sydd newydd ddod â rhediad o 18 gêm heb ennill i ben.

Ar hyn o bryd Tandy, 45, yw hyfforddwr amddiffyn yr Alban ac mae wedi creu cryn argraff yno dros y chwe blynedd diwethaf.

Roedd y gŵr o ardal Tonmawr yng Nghastell-nedd Port Talbot yn rhan o dîm hyfforddi Warren Gatland ar gyfer taith y Llewod i Dde Affrica yn 2021.

Fe dreuliodd gyfnod fel hyfforddwr amddiffyn i dîm y Waratahs yn Awstralia hefyd.

"Mae dod yn brif hyfforddwr fy ngwlad yn anrhydedd ac yn fraint enfawr," meddai Tandy.

"Rwy'n edrych ymlaen at chwarae rhan yn y cyfnod ailadeiladu o fewn rygbi Cymru a dod â'r tîm cenedlaethol yn ôl i gystadlu gyda'r timau gorau yn y byd.

"Rwy'n gyffrous am botensial rygbi Cymru a'r grŵp o chwaraewyr ifanc, gweithgar sydd gennym.

"Mae'r gemau yn yr hydref yn gyfle enfawr ac yn rhoi cyfle i ni brofi ein hunain yn erbyn rhai o dimau gorau rygbi'r byd."

Bydd Tandy yn arwain Cymru am y tro cyntaf yn erbyn yr Ariannin yn yr hydref, cyn wynebu Japan, Seland Newydd, a De Affrica

Cafodd ei ddiswyddo fel prif hyfforddwr y Gweilch yn 2018 ar ôl cael ei benodi i'r swydd yn 2012 yn 32 oed.

Roedd y cyn-flaenasgellwr, chwaraeodd dros 100 o gemau i'r Gweilch, wedi ennill teitl y Pro12 yn ei dymor cyntaf fel hyfforddwr.

"Rydym yn falch iawn o benodi Steve fel prif hyfforddwr newydd Cymru," meddai prif weithredwr URC, Abi Tierney.

"Ar ôl proses benodi fanwl a thrylwyr, daeth Steve i'r amlwg fel yr ymgeisydd gorau, ac rydym yn gwybod ein bod wedi sicrhau'r hyfforddwr gorau posibl ar gyfer y swydd.

"Mae hon yn benodiad allweddol i ni ac yn rhan annatod o'n strategaeth bum mlynedd wrth i ni geisio llwyddiant cynaliadwy i'n tîm dynion hŷn.

"Mae Steve yn addas iawn o ran y berthynas y gall ei chreu gyda grŵp ifanc o chwaraewyr talentog, ond hefyd yr effaith gadarnhaol y gwyddom y gall ei chael ar ecosystem gyfan rygbi fel Cymro balch.

"Ein tasg nawr yw sicrhau bod gan Steve y gefnogaeth a'r adnoddau sydd eu hangen arno i lwyddo yn y rôl hon."

Bydd Tandy yn arwain Cymru am y tro cyntaf yn erbyn yr Ariannin yn Stadiwm Principality ar 9 Tachwedd, cyn wynebu Japan, Seland Newydd, a De Affrica yng ngweddill gemau'r hydref.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.