Machynlleth 'yn y tywyllwch' heb unrhyw oleuadau Nadolig

Yn wahanol i drefi eraill yn yr ardal, does dim goleuadau Nadolig ar hyd y brif stryd ym Machynlleth eleni

Ni fydd goleuadau Nadolig ar hyd stryd fawr Machynlleth eleni oherwydd anghydfod ynglŷn â'r gost o'u codi a'u tynnu lawr.

Yn ôl Clwb Rotari Machynlleth, roedd y gost o gael Cyngor Powys i osod y goleuadau Nadolig y llynedd yn rhy uchel, ac fe wnaeth rhai ohonyn nhw fethu â goleuo.

Dywedodd Cyngor Powys nad yw Clwb Rotari Machynlleth wedi bod mewn cyswllt am ddyfynbris ar gyfer gosod addurniadau Nadolig eleni.

Dywedodd y clwb rotari mewn datganiad eu bod wedi penderfynu, er "yn anfodlon", i beidio â darparu goleuadau Nadolig yn y dref eleni.

Y rheswm sydd wedi ei roi yn y datganiad yw'r "gost gosod annerbyniol o uchel" a gafodd ei gynnig gan Gyngor Powys.

Ychwanegodd y clwb rotari bod "methiant sawl polyn lamp" i oleuo'r goleuadau Nadolig y llynedd, yn ffactor hefyd.

Perchnogion y goleuadau yw'r clwb rotari, sy'n dweud bod y goleuadau wedi bod yn "nodwedd sy' wedi cael ei chroesawu ym Machynlleth ers blynyddoedd lawer".

Mae'r clwb yn dweud eu bod wedi gwella'r goleuadau yn ystod y blynyddoedd diwethaf ar ôl derbyn "rhodd hael" gan fusnes lleol.

"Mae gennym ni lawer o siopau a busnesau bach ac yn anffodus byddwn yn cael ein gadael yn y tywyllwch heb oleuadau," meddai David Hennighan

Dywedodd David Hennighan, aelod o'r clwb rotari a pherchennog siop sglodion Hennighan's, fod y gost o osod a thynnu'r goleuadau Nadolig bedair gwaith yn uwch nag oedd yn arfer bod.

Ychwanegodd eu bod wedi cael "dyfynbris chwerthinllyd am roi'r goleuadau i fyny ac i lawr - rhywbeth sy'n cymryd tua phump i chwe awr".

"Fe ofynnon nhw i ni dalu £1,600 llynedd, a TAW ar ben hynny.

"Yn y gorffennol rydym wedi talu £400-£500 am wneud union yr un peth.

"Mae'r gost, mewn gwirionedd, bedair gwaith yn uwch."

Fe honnodd Mr Hennighan hefyd nad oedd "hanner y goleuadau'n gweithio" a bod hynny oherwydd yr "amodau trydanol" y tu fewn i rai o'r polion lamp roedd y goleuadau wedi'u cysylltu â nhw.

Mae gan Fachynlleth goeden Nadolig gyda goleuadau, sydd i fod i gael ei goleuo nos Sadwrn

"Yn llythrennol, byddwn yn cael ein gadael yn y tywyllwch," meddai Mr Hennighan.

Fe wnaeth y gymhariaeth ag ardaloedd eraill fel "y Drenewydd a'r Trallwng, a bydd ganddyn nhw ddigwyddiad mawr iawn, a'r holl drefi mawr eraill yn yr ardal".

Roedd yn poeni na fyddai na fyddai hyn gwneud "llawer i hwyl yr ŵyl".

"Mae gennym ni lawer o siopau a busnesau bach ac yn anffodus byddwn yn cael ein gadael yn y tywyllwch heb oleuadau."

Mae gan Fachynlleth goeden Nadolig gyda goleuadau, sydd i fod i gael ei goleuo ar 29 Tachwedd.

Ond yn wahanol i drefi eraill yn yr ardal, does dim goleuadau Nadolig ar hyd y brif stryd eleni.

'Dim rhaid defnyddio'r cyngor'

Dywedodd llefarydd ar ran Cyngor Sir Powys: "Nid yw Clwb Rotari Machynlleth wedi cysylltu â Chyngor Sir Powys am ddyfynbris ar gyfer gosod addurniadau Nadolig eleni.

"Rydym wedi bod mewn cysylltiad â'r clwb rotari ynghylch y methiannau a adroddwyd ac wedi cynghori, gan fod yr asedau hyn yn cael eu rheoli gan Asiantaeth Cefnffyrdd Gogledd a Chanolbarth Cymru, y byddai angen eu caniatâd i newid unrhyw amseryddion.

"Mae'n bwysig nodi nad oes raid i'r clwb rotari defnyddio Cyngor Sir Powys i osod addurniadau."

Dywedon nhw hefyd bod y cyngor yn parhau wedi ymrwymo i gefnogi cymunedau lleol.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.