Lleihau dedfryd menyw wnaeth achosi marwolaeth babi wyth mis oed

Bu farw Mabli Cariad Hall ychydig ddyddiau wedi'r gwrthdrawiad ym Mehefin 2023

Mae dedfryd menyw 71 oed wnaeth achosi marwolaeth babi wyth mis oed mewn gwrthdrawiad wedi cael ei leihau yn y Llys Apêl.

Roedd Mabli Cariad Hall o Gastell-nedd yn ei phram y tu allan i Ysbyty Llwynhelyg pan gafodd ei tharo gan gar Bridget Carole Curtis ym Mehefin 2023, a bu farw bedwar diwrnod yn ddiweddarach yn dilyn anaf difrifol i'w hymennydd.

Roedd Curtis, o Fegeli yn Sir Benfro, wedi pledio'n euog i gyhuddiad o achosi marwolaeth trwy yrru'n beryglus ac fe gafodd ei dedfrydu i bedair blynedd dan glo.

Daeth barnwyr y Llys Apêl i'r casgliad ddydd Mawrth fod y ddedfryd wreiddiol yn "ormodol", a cafodd ei gwtogi i dair blynedd o garchar.

Dywedodd teulu Mabli eu bod yn siomedig bod y ddedfryd wedi'i lleihau, ond yn falch bod y llys wedi cytuno gyda'r dyfarniad gwreiddiol ei bod yn drosedd o yrru peryglus.

Cafodd Bridget Carole Curtis ei dedfrydu i bedair blynedd dan glo ym mis Ionawr

Fe glywodd ar achos gwreiddiol fod Curtis wedi colli rheolaeth ar y car wrth iddi "chwilio am fag" ar sedd gefn y cerbyd cyn y digwyddiad ar 21 Mehefin 2023.

Dyna pryd y tarodd grŵp o bobl tu allan i fynedfa'r ysbyty.

Clywodd cwest i'w marwolaeth yn 2023 fod Mabli yn ei phram y tu allan yr ysbyty pan ddigwyddodd y gwrthdrawiad.

Bu farw bedwar diwrnod yn ddiweddarach yn Ysbyty Plant Bryste o anaf difrifol i'w hymennydd.

Achos 'wirioneddol drasig'

Yn y gwrandawiad ddydd Mawrth, fe ddywedodd Mr Ustus Butcher - un o'r tri barnwr ynghyd â Mr Ustus Bean a Richard Marks KS - fod yr achos yn un "wirioneddol drasig".

"Rydym wedi darllen datganiadau personol rhieni Mabli, yn sôn am eu galar yn sgil marwolaeth eu merch, a ni all unrhyw un beidio â chydymdeimlo â nhw wedi'r golled ofnadwy yma," meddai.

Wrth gadarnhau ei fod yn lleihau'r ddedfryd, dywedodd Mr Ustus Butcher: "Mae'n wir nad oedd yr apelydd wedi ceisio achosi unrhyw niwed, ac yn wir hefyd mai camgymeriad sydyn iawn oedd hwn, ond mae'r achos bendant yn cyrraedd y trothwy ar gyfer gyrru peryglus."

Ychwanegodd y byddai Curtis yn ymwybodol ei bod wedi stopio "mewn ardal brysur y tu allan i ysbyty gyda'r posibilrwydd bod unigolion bregus o'i chwmpas".

Dywedodd hefyd ei fod yn derbyn fod Curtis wir yn edifar am yr hyn ddigwyddodd ac mai "diffyg canolbwyntio a dryswch ynglŷn â pha bedal yr oedd hi'n ei wasgu wnaeth achosi'r trasiedi yma".

Yn ogystal â lleihau'r ddedfryd o bedair blynedd o garchar i dair, cafodd ei gwaharddiad rhag gyrru ei leihau o wyth mlynedd i saith mlynedd a hanner.

Y teulu'n 'siomedig'

Mewn datganiad, dywedodd teulu Mabli: "Rydym yn siomedig bod y ddedfryd wedi lleihau ond yn falch bod y Llys Apêl wedi cytuno bod y dyfarniad gwreiddiol am drosedd Categori B yn ddilys a bod y ddedfryd o garchar yn sefyll.

"Unwaith eto, diolchwn i bawb sydd wedi bod yn rhan o'r broses i sicrhau cyfiawnder i Mabli Cariad ac am yr holl gefnogaeth rydym wedi cael fel teulu yn sgil ein colled.

"Rydym yn dal i wynebu oes hebddi."