Llythrennau lliwgar yr artist Trin Brierley

Yn wreiddiol o'r Barri, mae'r artist Trin Brierley yn byw yn Llundain ac yn arbenigo mewn paentio arwyddion - hen grefft a oedd yn prysur ddiflannu ond sydd wedi cynyddu mewn poblogrwydd yn y blynyddoedd diwethaf.

Ges i fy ngeni yng Nghaerdydd ond fy magu yn y Barri.

Ers i mi fod yn fach, y cwbl o’n i’n ei wneud oedd tynnu llun. O’n i’n reit ddistaw a swil pan yn blentyn, a thynnu lluniau oedd beth o’n i’n ei wneud; o’n i yn fy myd bach fy hun!

Oedd gen i wastad ddiddordeb mewn llythrennau a daeth eu dylunio nhw yn reit naturiol.

‘Nes i ddechrau busnes paentio murluniau gyda ffrind, bron i 10 mlynedd yn ôl nawr. O furluniau nes i gwympo i mewn i baentio arwyddion a syrthio mewn cariad yn llwyr!

Mae’n sgil draddodiadol oedd fel arfer yn fwy o swydd dosbarth gweithiol a gwasanaeth cyhoeddus, tan i feinyl ddod mewn a diflannodd nifer o’r paentwyr arwyddion.

Ond nawr mae wedi cael adfywiad ac mae pobl yn dechrau deall pam fod arwydd wedi ei baentio â llaw gymaint gwell.

Cymerodd hi ychydig o flynyddoedd o gau fy hun yn y stiwdio gyda cherddoriaeth ymlaen, yn ymarfer brush strokes, a dyna sydd ei angen er mwyn gael rheolaeth a hyder gyda’r brws.

O’n i ar fin dechrau ar brentisiaeth ond ddigwyddodd Covid, felly roedd rhaid i mi ddysgu fy hun ar y cyfan.

'Nes i ambell i gwrs gyda Mike Meyer, paentiwr arwyddion o America, a dysgais i lot. Yna es i i Tokyo Letter Heads yn 2019, sef cynhadledd ryngwladol i baentwyr arwyddion.

Mae’n siŵr mai fan’na y dysgais i’r mwya’ o bethau, achos roedd yna weithdai gyda phaentwyr a chrefftwyr o amgylch y byd mewn un lle a phobl ar lefelau gwahanol. Roedd rhai pobl yn ddechreuwyr, yn rhoi cynnig arni, ac eraill wedi bod yn paentio tryciau ers 50 mlynedd. Roedd e’n anhygoel.

Mae’n denu nifer o bobl eithaf tebyg. Mae’n rhywbeth mae rhai pobl jest yn syrthio mewn cariad gydag e ac yn mynd yn geeky iawn amdano fe!

Mae gan bawb ei steil ei hun heb wir drio, gan ei fod am y ffordd ti’n defnyddio’r brws. Weithiau, ti’n gallu 'nabod steil rhywun a gwybod pwy sydd wedi paentio’r arwydd.

Mae’n rhaid i ni frwydro’n ddyddiol yn erbyn feinyl ac egluro pam ei bod hi gymaint gwell i ddewis arwydd wedi ei baentio â llaw.

Efallai ei fod e ychydig bach yn ddrytach ond mae’r fersiwn terfynol yn hardd ac yn hollol unigryw, heb sôn am faint yn hirach y bydd yn para’. Gall rhai arwyddion sydd wedi eu paentio â llaw bara’ degawdau, os nad canrifoedd.

Hoffen i feddwl y gallet ti neud hyn unrhywle ym Mhrydain, ond yn amlwg mae yna lawer mwy i fusnesau yn Llundain, ac felly llawer mwy o waith.

Mae’r prosiectau wastad mor amrywiol, sef beth sydd mor wych am y swydd. Un diwrnod ti’n ysgrifennu bwydlen mewn tafarn, y diwrnod nesa' yn goreuro (gilding) ffenest ac yna’n cael comisiwn i baentio jwg grefi!

Trin Brierley gyda rhai esiamplau o'i gwaith