Dim newid i dîm Cymru fydd yn wynebu'r Alban yn y Chwe Gwlad

Daeth Cymru'n agos at sicrhau buddugoliaeth annisgwyl yn erbyn Iwerddon yn eu gêm ddiwethaf

Mae prif hyfforddwr dros dro Cymru, Matt Sherratt wedi cadarnhau na fydd unrhyw newidiadau i'r tîm fydd yn wynebu'r Alban yn y Chwe Gwlad ddydd Sadwrn.

Mae Dewi Lake bellach yn holliach i fod ar y fainc yn dilyn anaf, gyda Keiron Assiratti hefyd yn ôl ymysg yr eilyddion.

Dangosodd tîm Cymru arwyddion o welliant yn y gêm Chwe Gwlad ddiwethaf yn erbyn y Gwyddelod bron i bythefnos yn ôl.

Os na fydd unrhyw newidiadau funud olaf, dyma fydd y tro cyntaf i Gymru roi tîm di-newid ar y cae ers 2019.

Mae Cymru ar rediad o 15 gêm heb fuddugoliaeth, gyda dwy gêm yn weddill yn y bencampwriaeth eleni.

Fe fydd y gic gyntaf ym Murrayfield am 16:45 brynhawn Sadwrn.

Ar ôl ennill yn erbyn yr Eidal yn eu gêm agoriadol, mae'r Alban wedi colli yn erbyn Iwerddon a Lloegr

Mi fydd Elliot Dee yn dechrau fel bachwr, gyda Nicky Smith a WillGriff John pob ochr iddo yn y rheng flaen.

Bydd Will Rowlands yn gobeithio adeiladu ar ei berfformiadau da yn yr ail reng, gyda Dafydd Jenkins wrth ei ymyl.

Jenkins a Tommy Reffell oedd yr unig ddau oedd yn dechrau yn erbyn yr Albanwyr yn y gystadleuaeth y llynedd.

Jac Morgan a Taulupe Faletau sy'n dechrau gyda Reffell yn y rheng ôl, gydag Aaron Wainwright wedi'i adael ar y fainc.

Dywedodd Faletau'r wythnos hon nad ydy o wedi rhoi'r ffidil yn y to o ran ei obeithion o fynd ar daith y Llewod yr haf yma.

Max Llewellyn a Ben Thomas fydd canolwyr Cymru, gyda Gareth Anscombe a Tomos Williams hefyd yn dechrau.

Mae cyfle arall i Ellis Mee, Blair Murray a Tom Rogers ddisgleirio, gyda Josh Adams yn parhau i fod yn absennol oherwydd anaf.

Mae Cymru'n teithio i Murrayfield gyda thair colled yn y bencampwriaeth hyd yn hyn, tra bod yr Alban yn bedwerydd - ar ôl curo'r Eidal yn eu gêm gyntaf.

Dywedodd Sherratt fod Cymru wedi "gosod her i ni'n hunain yr wythnos hon, i barhau i wella".

"Rydym eisiau cadw'r un bwriad a'r dewrder wnaethon ni ddangos y tro diwethaf, ond wrth adeiladu ar ein gêm."

Tîm Cymru

Murray; Rogers, Llewellyn, B Thomas, Mee; Anscombe, Tomos Williams; Smith, Dee, John, Rowlands, D Jenkins, Morgan (capt), Reffell, Faletau.

Eilyddion: Dewi Lake, G Thomas, Keiron Assiratti, Teddy Williams, Wainwright, R Williams, J Evans, J Roberts.