Holl swyddi academaidd Ysgol Gymraeg Prifysgol Caerdydd yn ddiogel

Bydd Prifysgol Caerdydd yn ymgynghori ar dorri 355 o swyddi yn hytrach na'r 400 a gyhoeddwyd yn wreiddiol ar ddiwedd mis Ionawr

Mae Newyddion S4C yn deall y bydd holl swyddi academaidd Ysgol Gymraeg Prifysgol Caerdydd yn cael eu diogelu, er gwaethaf cynlluniau i dorri cannoedd o swyddi.

Daw'r cyhoeddiad fel rhan o ddiweddariad y prifysgolion i'w staff ar gynlluniau i dorri cannoedd o swyddi.

Mae Newyddion S4C hefyd yn deall bod holl swyddi'r adran gyfrifiadureg bellach wedi eu diogelu yn ogystal â rhyw 350 o swyddi yn yr ysgol feddygaeth.

Yn dilyn 45 cais llwyddiannus am ddiswyddiad gwirfoddol, bydd y brifysgol nawr yn ymgynghori ar dorri 355 o swyddi yn hytrach na'r 400 a gyhoeddwyd yn wreiddiol ddiwedd mis Ionawr.

Dywedodd Yr Athro Gruffydd Aled Williams bod y newyddion fel "llygedyn bach o newyddion da"

Disgrifiodd yr Athro Gruffydd Aled Williams, sydd yn gyn-bennaeth ar adran y Gymraeg ym Mhrifysgol Aberystwyth, y newyddion fel "llygedyn bach o newyddion da yng nghanol môr o newyddion heb fod mor dda â hynny".

Er gwaetha'r cyfnod anodd ariannol i brifysgolion Cymru a Phrydain, mae e'n croesawu diogelu adrannau Cymraeg, a'n pwysleisio eu pwysigrwydd.

"Yn sicr heb y gefnogaeth mae'r Gymraeg wedi'i chael gan yr adrannau Cymraeg yn y gwahanol brifysgolion, mi fyddai cyflwr y Gymraeg a'i diwylliant yn llawer gwaeth nag y mae hi ar hyn o bryd," meddai.

"Pam bod nhw yn penderfynu trio neud pethau yn Kazakstan?" gofynna Dr Sion Llywelyn Jones

Ond roedd beirniadaeth heddiw eto gan undeb yr UCU wedi i Gyngor y Brifysgol gadarnhau cynlluniau'r wythnos hon i ddatblygu campws yn Kazakstan.

Dywedodd Sion Llywelyn Jones sydd yn cynrychioli'r undeb: "'Da ni'n teimlo eu bod nhw'n rhuthro fewn i hyn. Maen nhw wedi mynd amdani yn y misoedd diwethaf.

"Poeni ydan ni hefyd am drac record hawliau dynol Kazakstan.

"Dwi'n meddwl bod digon o broblemau o fewn Caerdydd ar hyn o bryd. Dwi'm yn dallt pam bod nhw wedyn yn penderfynu trio neud pethau yn Kazakstan?

"Byddai'n werth iddyn nhw ganolbwyntio ar Gaerdydd ar hyn o bryd."

Dywedodd llefarydd ar ran y Brifysgol nad ydyn nhw wedi buddsoddi unrhyw arian cyfalaf yn y campws yn Kazakstan a'u bod nhw wedi ymchwilio yn drylwyr i'r cynllun sydd yn cynnig cyfle i ehangu'n rhyngwladol.

Er eu bod nhw'n cydnabod gwahaniaethau mewn gwerthoedd, maen nhw'n hyderus y gallan nhw ddatblygu rhaglen yno sydd yn unol â'u gwerthoedd.