Menter gymunedol yn sicrhau prydles hen Ysgol Abersoch

Er gwaethaf ymgyrch i'w chadw ar agor fe gaeodd Ysgol Abersoch yn 2021

Mae menter leol wedi sicrhau prydles hen ysgol yng Ngwynedd er mwyn ei throi'n ganolfan gymunedol.

Mae grŵp cymunedol nid-er-elw Menter Rabar wedi sicrhau £400,000 ar ôl misoedd o ymgyrchu er mwyn adfywio hen ysgol fabanod Abersoch at ddiben y pentref a'r cymunedau cyfagos.

Er gwaethaf ymgyrch i'w chadw ar agor fe gaeodd Ysgol Abersoch yn 2021.

Dywedodd y grŵp mai'r bwriad yw datblygu'r ganolfan newydd i gynnwys caffi a theras, gardd, arddangosfa ar dreftadaeth Abersoch ac unedau busnes i'w rhentu.

Dywedodd llefarydd ar ran Cyngor Gwynedd y bydd y brydles hir dymor yn caniatáu'r fenter i "wireddu cynlluniau cyffrous i ddatblygu hen safle Ysgol Abersoch i fod yn adnodd cymunedol".

Yn dilyn misoedd o ymgyrchu, mae Menter Rabar wedi sicrhau £400,000 i adfywio'r hen ysgol

Dywedodd Einir Wyn, ysgrifennydd y fenter, ei bod "yn hynod falch" i weld yr hen ysgol yn ôl ym mherchnogaeth y gymuned.

"Bydd y prosiect yn dathlu a diogelu treftadaeth unigryw y pentref a'r gymuned trwy arddangosfa ac archif gyffrous, ryngweithiol," meddai.

"Bydd yn ganolfan fenter ffyniannus, yn cynnig man gweithio hyblyg a fforddiadwy i weithwyr cartref ac entrepreneuriaid i'w rentu.

"Cynigia'r caffi a'r ardd amrywiaeth gyfleoedd gwirfoddoli tra'n darparu gofod a ddyluniwyd yn hyfryd, sydd wir ei angen, yn y pentref."

'Taith hir a heriol'

Bydd gwaith hefyd yn cael ei wneud i wella effeithlonrwydd ynni'r adeilad drwy osod paneli solar a phwmp gwres o'r aer, ynghyd â darparu pwyntiau gwefru i geir trydan.

Dywedodd Ms Wyn y bydd yr iaith a diwylliant Cymraeg yn cael ei rannu "â phawb sydd yn ymweld, gweithio a byw yn Abersoch trwy gydol y flwyddyn".

Ychwanegodd y "bu'n daith hir a heriol ar brydiau" ond eu bod wedi profi fod cymuned Abersoch yn gallu "gwneud pethau gwych".

"Dyma ddechrau newydd i Abersoch, ac yn ôl arwyddair yr ysgol bydd yn 'hwylio i'r dyfodol'."

Y cynlluniau ar gyfer y safle

Dywedodd y Cynghorydd Paul Rowlinson, aelod cabinet y cyngor dros dai ac eiddo: "Mae buddion economaidd, cymdeithasol ac amgylcheddol amlwg i gynlluniau Menter Rabar a rydw i'n hynod falch bod y cyngor yn gallu eu cefnogi drwy gynnig prydles hir dymor i'r fenter am swm enwol.

"Mae Menter Rabar wedi llwyddo i godi llawer o arian i'w fuddsoddi yn yr eiddo i'w wneud yn hwb hygyrch yng nghanol y pentref ar gyfer gweithgareddau a gwasanaethau amrywiol.

"Bydd y fenter gyffrous hon yn cynnig cyfleon i'r gymuned gyfan yma; bydd yn cynnig gofod i fusnesau, lle i'r gymuned ddod ynghyd a chyfleon i ddysgu am ddiwylliant a threftadaeth yr ardal.

"Bydd y gweithgareddau hyn hefyd yn cyfrannu at gryfhau'r iaith Gymraeg yn yr ardal."

Arwydd a gafodd ei osod ar un o gapeli'r pentref i hysbysebu'r ymgyrch y llynedd

Ychwanegodd y Cynghorydd John Brynmor Hughes, aelod lleol dros Abersoch gyda Llanengan: "Hoffwn ddiolch i bob aelod o'r pwyllgor am ei ymdrech ac am ei amser i wneud hyn yn fenter lwyddiannus.

"Hefyd diolch i bawb sydd wedi cefnogi'r fenter yn ariannol. Pob lwc am y dyfodol. Ymlaen ac i fyny."