'Antur o gwmpas Awstralia mewn campervan ar ben fy hun'

"Roeddwn i'n mynd i ddod i Awstralia ers mod i'n 18 ac oedd o'r amser cywir rŵan. Dwi wedi dod yma i weithio ond rili i gael antur."

Roedd Mae Morgan o Landrillo, Corwen, yn benderfynol o gael antur yn 2024. Ar ôl symud adref i gynilo arian wedi iddi fod yn gweithio fel nyrs yn Rhydychen, ei breuddwyd oedd mynd i Awstralia i weithio ac i deithio.

A dyma wnaeth hi ar ddiwedd 2024 pan deithiodd o gwmpas Awstralia mewn campervan ar ei phen ei hun.

Ar ôl hedfan i Brisbane dechreuodd Mae gynllunio'r antur, fel wnaeth hi esbonio ar raglen Caryl ar Radio Cymru: "Mi wnes i gychwyn yn y dwyrain a mynd i fyny i Cairns ar fws a wedyn meddwl, os dwi'n fflio i Darwin dwi'n gallu mynd lawr i Adelaide, lawr canol Awstralia a gyrru a neud bach o daith ohono.

"Mae Awstralia yn llawn backpackers a phobl yn gweithio felly 'nes i ddysgu wrthyn nhw beth oedd y peth iawn i neud.

"Yng nghanol y wlad mae'r Stuart Highway ac yn y gorffennol oedd o'n cael ei ddefnyddio am telegrams yn mynd i fyny ac i lawr. Wedyn 'nath nhw neud y ffordd syth yma. Felly o'n i'n meddwl, mae hynny yn ecseiting."

'Y campervan ar ôl siopa! Stop cyntaf roedd Oriel Cynfrodorol Ubirr yn Parc Genelaethol Kakadu'

Y daith

Cyrhaeddodd Mae yn Awstralia ym mis Medi, gan benderfynu teithio am 3-4 mis cyn cychwyn gweithio yno fel nyrs am gyfnod.

Ar ôl hedfan i Brisbane roedd rhaid dal bws Greyhound i Darwin ac yna cychwynnodd ar ei thaith mewn campervan ar hyd y Stuart Highway i lawr i'r de.

Ac mae'r rheswm am ddewis campervan yn mynd yn ôl i blentyndod Mae, fel mae'n esbonio: "Pan o'n i'n ifanc o'n i'n caru Scooby Doo ac maen nhw'n gyrru y mystery machine. Mae'n rhad yma i gael nhw felly 'nes i neud y daith mewn mystery machine."

Faint o bellter sy', felly, rhwng Darwin a Adelaide?

Meddai Mae: "'Nes i fynd i ffwrdd o'r ffordd a 'nes i neud 5800km. Mae'n bell.

"Naill ochr i'r ffordd syth mae 'na lot i weld - mae 'na lefydd fel y National Park yn Kakadu.

"Mae 'na lot o blanhigion a lot o anifeiliaid!

"Dwi wedi gweld 2-3 neidr. Dwi'n well 'da'r creepy crawlies na o'n i'n meddwl. Dyw nhw ddim isio cyfarfod gyda ti felly jest cario mlaen.

"O'n i'n ofnus yn cerdded yn y bush achos mae na lot yno."

'Es i ar drip i Katherine Gorge, mae'r gymuned gynfrodorol yn edrych ar ôl yr parc, ac mae yna reolau penodol yn ei ddiwylliant yn dweud bo' nhw ddim yn gallu cyffwrdd y dŵr'

Ond y perygl mwyaf oedd y ffaith fod 'na bellteroedd mawr rhwng trefi – ac hefyd dim signal ffôn – felly roedd rhaid i Mae baratoi'n drylwyr gan ei bod ar ei phen ei hun, fel mae'n esbonio: "O'n i'n gorfod cael bwyd am 2 wythnos. Yn y llefydd mawr mae 'na siopau ond rhag ofn ti'n gorfod cael 2 wythnos o fwyd.

"Ac oedd pawb yn dweud dŵr – mae dŵr yn fwy pwysig na bwyd. O'n i'n cario 10 litr o ddŵr bob amser. Ti'n gorfod meddwl am y campervan hefyd a beth os mae'n rhy boeth...

"Yn Darwin oedd o'n 45 degrees felly ti'n gorfod yfed un litr o ddŵr am bob awr chi tu allan."

'Yn tafarn Daly Waters, mae pobl o lefydd gwahanol yn gadael pethau i gynrychioli eu gwlad a darganfyddais fflag Cymru!'

Beth os oedd rhywbeth yn mynd o'i le ar y fan?

Meddai Mae: "Dwi'n gwybod sut i newid teiar ac os mae'r levels yn anghywir dwi'n gallu fixeo hynny. Os fydden i mewn tref fydden i'n gallu ffonio rhywun."

Ar cychwyn y daith roedd y campervan yn dangos 300,000 o km ar y cloc ond 'nath hynny ddim poeni Mae: "Doedd yr air conditioning ddim yn gweithio felly oedd y ffenestri ar agor. Dwi'n caru pethau hen ddo – os ydy nhw'n gweithio maen nhw'n iawn."

Ond roedd y nosweithiau yn fwy heriol: "Yn y noson gyntaf o'n i ddim yn cysgu – oedd 'na anifeiliaid a sŵn wahanol. Ond ar ôl hynny mae jest yn normal. Mae rhywbeth yn eich ymennydd yn newid a chi'n gorfod cysgu.

"Dwi'n hoffi dysgu am bethau eraill."

'Karlu Karlu/Devils marbles wrth ymyl Tennant Creek. Mae rhain yn gysegredig i'r pobl leol Kaytete, Warumungu, Warlpiri ac Alyawarra'

Beth, felly, yw'r antur nesaf? Ar ôl gorffen y daith yn Rhagfyr aeth Mae yn ôl i Brisbane i weithio fel nyrs. A'r antur nesaf yw Zeland Newydd yn Chwefror.

'Cyrraedd Alice Springs, sydd yn cynrychioli'r dechrau'r 'Red centre', oedd o'n amlwg pam!'

Cyngor Mae i unrhyw un sy'n ystyried teithio

"Mae pawb yn gallu neud o ond chi'n gorfod planio. Dwi wedi cyfarfod lawer o bobl sy' wedi dod am flwyddyn a ddim yn gwybod beth maen nhw isho neud. Os ti'n neud rhywbeth fel hwn neu unrhyw antur, planiwch a chymryd yr amser i weld popeth.

'Arwydd yn gwasanaethau Stuart Wells, mae nhw yn galw nhw yn 'roadhouses', ac mae gan nhw popeth rwyt ti angen, WiFi hefyd!'

'Parc Cenedlaethol Kata Juta, cerdded yn ceunant Walpa Gorge, i rhoi parch i'r cymuned cynfrodorol mae'n nhw'n gofyn i chi cael yr ddwy ochr o'r ceunant yn pob llun rydech chi'n tynnu'

'Uluru yn yr bore, gyda'r Oriel 'Field of Light' tu flaen'

'Glendambo, rhwng Coober Pedy a Wilpena Pound, roedd yna fwy anifeiliaid na pobl yr holl ffordd o Gogledd i Dde'

'Wrth ymyl Wilpena Pound, mae'r cangarŵ yn Awstralia fel dafad yng Ngymru'

'Oriel cynfrodorol Arkaroo, gan yr pobl Adnymathanha, o gwmpas 5,000 mlwydd oed!'

''Second Valley' wrth ymyl Cape Jervis'

''Second Valley' wrth ymyl Cape Jervis eto - mae'n ddiddorol pa mor gyflym mae'n newid o anialwch i mynyddoedd, craig a môr'