Arestio cannoedd wedi ymgyrch ar weithwyr anghyfreithlon

Mae mwy na 590 o bobl wedi cael eu harestio dan amheuaeth o weithio'n anghyfreithlon yng Nghymru rhwng Hydref 2024 a Medi 2025, meddai'r Swyddfa Gartref.

Dywed y Swyddfa Gartref fod hyn yn gynnydd o 98% ar y flwyddyn flaenorol ac roedd yn rhan o'r "ymgyrch fwyaf ar weithwyr anghyfreithlon ers i gofnodion ddechrau" ar ôl cynnydd mewn cyrchoedd mewnfudo ar fusnesau ledled y DU.

Dywedodd yr Ysgrifennydd Cartref Shabana Mahmood y "bydd y sawl sy'n gweithio'n anghyfreithlon mewn salonau harddwch, yn golchi ceir ac fel gyrwyr yn cael eu harestio, eu cadw a'u symud o'r wlad hon".

Cadarnhaodd gweinidogion fod "mwy nag 8,000 o fewnfudwyr anghyfreithlon" wedi cael eu harestio ledled y DU o fewn y 12 mis diwethaf.

Fel rhan o'r ymgyrch, cafodd saith o ddinasyddion Tsieineaidd eu harestio ar safle adeiladu ar y Gŵyr ar 14 Hydref.

Cafodd tri eu harestio mewn barbwr ym Mhorthmadog ar 12 Medi ac wyth eu harestio mewn warysau yng Nghil-y-Coed ar 5 Awst.

Arweiniodd yr ymgyrch genedlaethol at symud mwy na 1,050 o ddinasyddion tramor o'r DU dros yr un cyfnod.

Dywedodd Llywodraeth y DU eu bod yn "ehangu gwiriadau hawl i weithio" i'r hyn a elwir yn economi gig "lle mae lefelau uwch o fewnfudwyr anghyfreithlon yn chwilio am waith".

Targedodd eu hymgyrch fusnesau sy'n aml yn dibynnu ar weithwyr achlysurol neu dros dro, gan gynnwys bwytai tecawê bwyd cyflym, salonau harddwch a gorsafoedd golchi ceir.

Dywedodd y Swyddfa Gartref eu bod yn anelu at "leihau'r economi ddu a chosbi cyflogwyr twyllodrus sy'n anwybyddu rheolau mewnfudo".

Dywedodd yr Ysgrifennydd Cartref Shabana Mahmood: "Mae gweithio anghyfreithlon yn creu cymhelliant i bobl sy'n ceisio cyrraedd y wlad hon yn anghyfreithlon. Dim mwyach".

"Gwnaf beth bynnag sydd ei angen i ddiogelu ffiniau Prydain."

'Mesurau perfformiadol'

Ymatebodd llefarydd ar ran Plaid Cymru: "Yn amlwg, dylai gweithwyr anghyfreithlon a'r rhai sy'n eu cyflogi gael eu dwyn i gyfrif gan y gyfraith, ond nid yw mesurau perfformiadol a chyfleoedd i dynnu lluniau yn ateb i gamreoli parhaus yn y Swyddfa Gartref, y mae'r Ysgrifennydd Cartref yn cyfaddef 'nad yw eto'n addas at y diben'.

"Mae angen i'r Swyddfa Gartref ailwampio'r system brosesu lloches gyfan a sicrhau llwybrau mudo diogel a rheoledig i bobl sy'n gymwys i ddod i'r DU."

Dywedodd llefarydd ar ran plaid Reform fod y "ffigyrau hyn yn darlunio hanes llwm yr hen bleidiau ar fewnfudo a gweithio anghyfreithlon.

"Mae llywodraethau Llafur a Cheidwadol olynol wedi caniatáu i'r economi danddaearol ffynnu drwy fethu â rheoli ein ffiniau a mynd i'r afael â'r arferion hyn.

"Yr unig blaid sydd ag unrhyw hygrededd gyda'r cyhoedd ar roi terfyn ar hyn yw Reform."

Dywedodd llefarydd ar ran y Ceidwadwyr mai "diferyn yn y môr ydy'r ffigwr yma o gymharu â'r 36,000 o bobl y mae Llafur wedi caniatáu i ddod mewn i'n gwlad yn anghyfreithlon eleni".

"Dim ond y Blaid Geidwadol sydd â chynllun difrifol i sicrhau ffiniau cryfach. Mae ein Cynllun Ffiniau yn barod i'w weithredu."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.