Rosh Hashanah: Dathlu dechrau melys i flwyddyn newydd

Zoë gyda Siôn, ei gŵr, a'u plant, Hari a Beti, yn nathliad Batmitzvah Beti eleni

Mae hi'n gyfnod o ddathlu Rosh Hashanah i Iddewon ledled y byd.

Eleni, mae'r ŵyl - sy'n un o wyliau pwysicaf y calendr Iddewig - yn para' o fachlud 22 Medi hyd hwyrnos 24 Medi.

Un sydd yn dathlu yw Zoë Tudur o Gaerdydd, ac yma mae hi'n egluro beth mae ei hoff ŵyl Iddewig yn ei olygu iddi hi:

Croeso i flwyddyn 5786!

Dyma'r flwyddyn newydd Iddewig, amser i adlewyrchu a dathlu beth 'dyn ni'n ei obeithio fydd yn ddechrau newydd, melys.

Mae Iddewiaeth yn dilyn calendr y lleuad, felly mae Rosh Hashanah ar ddyddiad gwahanol bob blwyddyn, ond bob tro tua mis Medi, ac yn para' deuddydd. Eleni byddwn ni'n croesawu'r flwyddyn 5786.

Yn y pen draw, dathlu cread Adda ac Efa mae Rosh Hashanah, y Dyn a'r Ddynes Gyntaf a'u rôl nhw o fewn y ddynoliaeth, fel a nodwyd gan Dd-w (dydyn ni ddim yn ysgrifennu Ei enw yn llawn, rhag ei gymryd yn ofer). Mae felly am y berthynas rhwng D-w a dyn.

Mae chwarae'r Shofar yn rhan bwysig o ddathliadau Rosh Hashanah

Mae 'na nifer o arferion crefyddol 'dyn ni'n cadw atyn nhw yn ystod Rosh Hashanah, ond mae yna hefyd nifer o draddodiadau 'dyn ni'n eu dilyn, a rhain yw'r pethau dwi'n eu hoffi.

Un o'r prif ddefodau yw gwrando ar gân y Shofar - sef corn maharen sy'n cael ei ganu yn y Synagog.

Mae'r Shofar yn cael ei chwythu wrth i'r haul fachlud ar noswaith olaf Rosh Hashanah fel cydnabyddiaeth o alwad y bobl i'w Brenin, ond hefyd fel cri o edifeirwch gan fod hyn yn nodi'r 10 diwrnod o edifarhau sy'n dilyn Rosh Hashanah.

Mae'r mêl ac afalau yn arwydd o'r gobaith am flwyddyn newydd felys

Fodd bynnag, mae hefyd elfennau eraill sy'n arwyddocaol i mi ar lefel bersonol.

I mi, mae Rosh Hashanah yn llawn arogleuon, blasau a thraddodiadau sydd nid yn unig yn f'atgoffa o fy mhlentyndod ond hefyd yn ategu fy hunaniaeth fel Iddewes, sydd yn hynod bwysig i mi.

Yn gyntaf, oherwydd yr adeg o'r flwyddyn, mae yna'n aml goncyrs a mes ar y llawr, sydd wastad yn fy atgoffa o Rosh Hashanah, ac fel yn ystod gwyliau eraill Iddewig, rydyn ni'n dathlu gyda'n teuluoedd a llawer o fwydydd blasus.

Dros y deuddydd, rydyn ni'n bwyta llawer o fwyd melys, sydd yn symbol o'r flwyddyn newydd felys rydyn ni'n gobeithio amdani - rydyn ni'n bwyta afalau gyda mêl wedi ei daenu drostyn nhw, ac yn rhannu cacennau mêl â chyfeillion.

Hari, Zoë, Beti a Siôn - mae plant Zoë yn mynd i'r Synagog yn lle mynd i'r ysgol, y diwrnod ar ôl dechrau Rosh Hashanah, lle bydd gwasanaethau arbennig

Fel arfer, rydw i, fy ngŵr a'n plant yn croesawu Rosh Hashanah yn nhŷ fy rhieni; does dim yn bwysicach i mi na phasio'r traddodiadau hyn sy'n rhan o Rosh Hashanah ymlaen i'm plant.

Rydyn ni'n cynnau canhwyllau, llefaru bendithion ac mae fy rhieni yn paratoi pryd ar gyfer ein teulu a ffrindiau er mwyn cael dathliad mawr. Fore drannoeth, byddwn ni'n mynd i'r Synagog.

Mae hi'n arfer i ddymuno blwyddyn newydd hapus a iach i bawb, felly fel y dywedwn ni, L'shana tova!

• Cafodd fersiwn o'r erthygl yma ei chyhoeddi yn 2015.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.