Cyngor yn cynnig symud gwaith Banksy 'i'w ddiogelu'

Fe allai gwaith celf gan yr arlunydd Banksy sydd ar ochr garej ym Mhort Talbot gael ei symud er mwyn ei ddiogelu, yn ôl y cyngor sir.

Mae swyddogion Cyngor Castell-nedd Port Talbot wedi dweud y byddai'r awdurdod yn talu am "fenthyg" y graffiti i'r cyhoedd "yn barhaol".

Mae perchennog y garej, Ian Lewis wedi dweud ei fod yn ystyried sawl cynnig ac y byddai'n cwrdd â phobl sydd â diddordeb yn fuan.

Mae'r cyngor wedi dweud mai Mr Lewis sydd berchen y gwaith celf, a'u bod eisoes wedi gwneud cynnig iddo.

• Perchennog garej Banksy 'angen help'

• Cadarnhau gwaith Banksy ym Mhort Talbot

Dywedodd un o'r swyddogion: "Byddai'r cyngor yn symud, storio ac yn ei adleoli i safle sydd eto i'w benderfynu yn dilyn ymgynghoriad cyhoeddus.

"Rydym wedi argymell talu am y gost yn llawn, gan gynnwys adeiladu garej arall yr un fath - ond mae Mr Lewis wedi gwrthod cyfarfod i drafod y mater ymhellach."

Mae perchennog y garej, Ian Lewis yn dweud ei fod wedi bod yn "gyfnod anodd"

Yn ôl Mr Lewis, ers i'r gwaith celf ymddangos ym mis Rhagfyr mae hi wedi bod yn gyfnod "hynod, hynod o anodd, ac yn hynod swrrealaidd".

Dywedodd wrth BBC Cymru ei fod yn ei gweld hi'n anodd ymdopi gyda'r miloedd o bobl sy'n dod i edrych ar y gwaith yn ddyddiol.

"Mae'r cyfan wedi bod yn ormod. I ddweud y gwir rwy'n rhedeg atyniad gelf ar fy mhen fy hun," meddai.

Mae'r cyngor wedi dweud eu bod yn deall fod y perchennog eisiau mynd ar ôl opsiynau eraill ar gyfer y darn Banksy, ond mae drysau'r awdurdod "yn parhau'n agored" os yw'n newid ei feddwl.

"Nid ein heiddo ni yw e ac mae dyfodol y gwaith celf a'r effaith ar y bobl leol yn nwylo'r perchennog garej," meddai'r swyddog.