Cau arddangosfa Cymro oherwydd llifogydd yn Fenis

Cafodd Sean Edwards ei ddewis i gynrychioli'r gelf gyfoes orau o Gymru yn yr ŵyl

Mae llifogydd difrifol wedi arwain at orfod cau arddangosfa artist o Gymru yn Biennale Fenis.

Ers mis Mai mae Sean Edwards wedi bod yn arddangos ei waith yn yr ŵyl gelfyddydol - sy'n lwyfan i gelf gyfoes o bob cwr o'r byd.

Roedd disgwyl i'r ŵyl ddod i ben ar 24 Tachwedd, ond mae Fenis wedi cael ei daro gan y llifogydd gwaethaf iddyn nhw ei weld ers 50 mlynedd.

Dywedodd Mr Edwards bod y penderfyniad i gau'r arddangosfa yn fuan wedi bod yn un "anodd".

• Mam yn helpu cynrychioli Cymru yn Fenis

• Dewis Sean Edwards ar gyfer y Biennale

Yn gynharach yn yr wythnos fe rannodd Mr Edwards fideo ar wefan cymdeithasol o ddŵr yn llifo i mewn i'r arddangosfa.

Yr enw ar yr arddangosfa yw Undo Things Done, ac mae'n defnyddio cerfluniau, fideo, tecstilau a delweddau - yn ogystal â pherfformiad gan ei fam - i archwilio hanes, gwleidyddiaeth a lleoliadau dosbarth gweithiol.

"Yn anffodus rydyn ni wedi gorfod gwneud y penderfyniad anodd i gau'r arddangosfa. Diolch yn fawr i'r tîm allan yn Fenis am eu holl waith yn ystod yr wythnos," meddai.

Dyma'r llifogydd gwaethaf i Fenis ei brofi ers hanner canrif

Mae Cymru wedi cael presenoldeb yn Biennale Fenis ers 2003, gydag artistiaid yn cael eu dewis i gynrychioli'r gelf gyfoes orau o Gymru bob dwy flynedd.

Dywedodd trefnwyr yr arddangosfa, Wales in Venice, mewn datganiad: "Rydyn ni'n ymddiheuro o galon i unrhyw un oedd yn gobeithio ymweld â'r arddangosfa wythnos nesaf.

"Rydyn ni'n ddiolchgar bod y tîm yn ddiogel a bod bron i 25,000 o ymwelwyr wedi gallu gweld y gwaith. Rydyn ni'n cydymdeimlo yn arw a phobl Fenis a phawb sydd wedi cael eu heffeithio gan y llifogydd."

Ychwanegodd y trefnwyr eu bod nhw'n bwriadu arddangos y gwaith yn y Deyrnas Unedig yn y flwyddyn newydd.