Carcharu gyrrwr bws am achosi marwolaeth teithiwr

Mae Eric Vice 'wedi'i lyncu gan euogrwydd' wedi'r gwrthdrawiad, yn ôl ei fargyfreithiwr

Mae gyrrwr bws deulawr wedi cael ei garcharu am achosi marwolaeth teithiwr wedi i'r cerbyd daro pont rheilffordd.

Bu farw Jessica Jing Wren, academydd 36 oed o Brifysgol Huanghuai yn China, wedi'r gwrthdrawiad yn Abertawe yn Rhagfyr 2019.

Roedd Ms Ren yn treulio cyfnod gydag adran Cyllid a Chyfrifon Ysgol Rheolaeth, Prifysgol Abertawe.

Cafodd Eric Vice, 64, ddedfryd o ddwy flynedd a hanner ar ôl pledio'n euog i gyhuddiad o achosi marwolaeth trwy yrru'n beryglus.

Fe blediodd yn euog hefyd i achosi anaf difrifol trwy yrru'n beryglus mewn gwrandawiad yn Llys Y Goron Abertawe.

Roedd Richard Thompson, myfyriwr 20 oed, ymhlith nifer o bobl a gafodd eu hanafu yn y digwyddiad.

Roedd Jessica Jing Ren yn briod ac yn fam i fachgen oedd yn bump oed adeg ei marwolaeth

Dywedodd yr erlynydd Carina Hughes fod Vice wedi gyrru'r bws, oedd yn teithio i'r brifysgol ar y pryd, i gyfeiriad gwahanol i'r arfer pan darodd y dec uchaf y bont ar Ffordd Castell-nedd.

Yn eu datganiadau dywedodd teithwyr bod hi'n ymddangos bod y bws yn rhedeg yn hwyr a bod y gyrrwr yn gadael i bobl fynd arno heb sganio'u tocynnau.

Clywodd y llys fod Vice, wrth i'r bws gyrraedd fan ble roedd yna draffig, wedi penderfynu dargyfeirio - rhywbeth yr oedd wedi gwneud sawl tro yn y gorffennol ond mewn bws unllawr.

Yn ôl datganiadau'r teithwyr, aeth y bws o dan fwa maen y bont reilffordd cyn taro'r bont ddur oedd yn is.

Roedd Ms Ren yn eistedd tua blaen y bws ar y dec uchaf. Cafodd ei chludo mewn hofrennydd i ysbyty yng Nghaerdydd ond bu farw 11 diwrnod yn ddiweddarach.

• Seren Olympaidd wedi'i anafu ar ol i fws daro pont

Dywedodd bargyfreithiwr yr amddiffyn fod yr achos "heb amheuaeth [yn amlygu] camfarnu catastroffig".

Ychwanegodd fod y diffynnydd "wedi'i lyncu gan euogrwydd - mae wedi cael diagnosis o anhwylder straen wedi trawma ac iselder difrifol".

Wrth ddedfrydu Vice, dywedodd y barnwr ei fod yn cymryd i ystyriaeth iddo bledio'n euog, ond bod ei "gamgymeriad" wedi achosi marwolaeth "academydd ifanc addawol".

Ychwanegodd mai "lladdfa" oedd yr unig ffordd o ddisgrifio'r olygfa wedi'r gwrthdrawiad "ond fe allai wedi bod sawl gwaith gwaeth".