Charli Britton: Hanner canrif o ddrymio a dylunio
- Cyhoeddwyd
Charli Britton y Drymiwr
Dros y penwythnos fe ddaeth y newyddion bod y drymiwr Charli Britton wedi marw yn 68 mlwydd oed.
Wrth rannu atgofion am ei gyd-aelod o'r band Edward H Dafis, fe wnaeth Cleif Harpwood dalu teyrnged i un o arwyr tawel y Sin Roc Gymraeg.
"Rydyn ni'n dueddol o anghofio pobl fel Charli... Roedd e yn y bac lein fel petai - y rheng ôl - ond fe oedd curiad calon ein cerddoriaeth ni."
"Mae e wedi cyfrannu'n ddi-bendraw i ddiwylliant cyfoes. Os edrychwch chi ar recordiau cyfnod cynnar cwmni Sain, byddwch chi'n siŵr o weld ei enw'n gyfrannydd fel cerddor ar lawer ohonyn nhw."
Caniatáu cynnwys X?
Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X, dolen allanol a pholisi preifatrwydd, dolen allanol cyn derbyn. I weld y cynnwys yma dewiswch ‘derbyn a pharhau’.
Fe weithiodd Charli ar ddwsinau o recordiau eiconig dros 50 mlynedd ac mae ei ddrymio i'w glywed ar rai o ganeuon enwocaf cyfnod ffurfiannol yn hanes cerddoriaeth cyfoes Gymraeg.
Dyma rai uchafbwyntiau o'i yrfa gerddorol amrywiol.
Edward H Dafis
Perfformiodd Charli Britton hefyd gyda bandiau a pherfformwyr fel Ac Eraill, Hergest a Tecwyn Ifan
Roedd yn aelod o Edward H Dafis o'r adeg cafodd y band ei sefydlu yn 1973, gyda Hefin Elis, John Griffiths a Dewi 'Pws' Morris - flwyddyn yn ddiweddarach fe ymunodd Cleif Harpwood fel prif leisydd y band.
Ar eu hanterth roedd y band yn gallu denu torfeydd o filoedd i'w gigs, ac fe wnaeth eu safon wrth berfformio'n fyw argraff fawr ar gynulleidfaoedd Cymru.
Caniatáu cynnwys YouTube?
Mae’r erthygl hon yn cynnwys deunydd gan Google YouTube. Gofynnwn am eich caniatâd cyn llwytho unrhyw beth, gan y gallai YouTube ddefnyddio cwcis neu dechnoleg arall. Mae’n bosib eich bod am ddarllen polisi cwcis Google, dolen allanol a pholisi preifatrwydd, dolen allanol cyn derbyn. Er mwyn gweld y cynnwys dewiswch ‘derbyn a pharhau’.
Nia Ben Aur
Pan gafodd opera roc uchelgeisiol Nia Ben Aur ei pherfformio am y tro cyntaf yn Eisteddfod Genedlaethol 1974, Charli Britton oedd wrth y drymiau. Dim ond unwaith cafodd y sioe ei pherfformio gan y cast gwreiddiol, ond fe gafodd ddylanwad mawr.
Charli oedd hefyd i'w glywed ar y recordiad enwog o'r sioe, ynghyd ag aelodau eraill o fand Edward H Dafis.
Injaroc
Injaroc oedd y supergroup Cymraeg cyntaf. Roedd Charli yn gweithio yn Llundain ar y pryd, ac fe fyddai yn teithio yn ôl a 'mlaen i Gymru i berfformio ar benwythnosau.
Fe ymunodd Geraint Griffiths, Caryl Parry Jones a Sioned Mair a rhai o aelodau Edward H Dafis i recordio'r albym Halen y Ddaear yn 1977.
Roedd yna lot o gyffro o amgylch y band wrth iddynt ffurfio, ond fe gafwyd ymateb chwyrn gan rai o ddilynwyr mwyaf brwd Edward H Dafis.
Ond mae rhai o ganeuon y band wedi hen ennill eu lle yn llyfrau hanes y Sin Roc Gymraeg, gyda fersiwn Diffiniad o'r glasur Calon yn anthem bop gyfoes bellach.
Dylunio cloriau
Yn ogystal â bod yn ddrymiwr dawnus roedd Charli hefyd yn dylunio cloriau recordiau.
Dyma rai enghreifftiau o'i waith:
Edward H Dafis - Hen Ffordd Gymreig O Fyw, 1974
Hergest - Casgliad o Ganeuon, 1991
Geraint Griffiths - Madras, 1984
Trwynau Coch - Y Casgliad, 1994
Anhrefn - Hen Wlad Fy Mamau - Land Of My Mothers, 2000
Delwyn Siôn - Chwilio am America, 2015
Hefyd o ddiddordeb: