Heddlu dillad cyffredin i batrolio bariau'r gogledd
- Cyhoeddwyd
![Clwb nos](https://ichef.bbci.co.uk/ace/standard/976/cpsprodpb/1246C/production/_121506847_gettyimages-1296496372.jpg)
Bydd heddlu dillad cyffredin ar ddyletswydd mewn bariau yn Wrecsam a Sir Fflint cyn y Nadolig fel rhan o ymgyrch i ddiogelu merched gyda'r nos.
Bydd y swyddogion yn gyfrifol am adnabod merched bregus a chwilio pobl am sylweddau i sbeicio diodydd.
Hwn fydd yr ymgyrch cyntaf o'r math yma yng Nghymru.
Cafodd yr ymgyrch ei gyhoeddi gan Heddlu Gogledd Cymru a Chomisiynydd Heddlu a Throsedd y Gogledd, Andy Dunbobbin.
Dywedodd Mr Dunbobbin y byddai defnyddio swyddogion dillad cyffredin yn atal troseddwyr rhag gwybod a ydyn nhw'n cael eu gwylio.
Bydd £202,000 yn mynd tuag at lansio'r ymgyrch.
Sut fydd yr ymgyrch yn gweithio?
Bydd y tîm o swyddogion yn cynnwys pedwar swyddog yn eu lifrau, dau swyddog dillad cyffredin, a sarjant. Yn ôl yr heddlu, bydd o leiaf un o'r rhain yn ferch.
Bydd swyddogion yn sicrhau fod merched bregus yn cael eu cludo adref gan unigolyn cyfrifol.
Hefyd, bydd tîm o staff drws yn cael ei osod i wylio safleoedd tacsi ar nosweithiau Gwener a Sadwrn.
Bydd tîm yn gwylio safleoedd tacsi ar nosweithiau Gwener a Sadwrn
Dywedodd y Comisiynydd Heddlu a Throsedd fod pobl yn cael mwy o drafferth i gael tacsi adref gyda'r nos oherwydd diffyg gyrwyr, a'u bod felly'n fwy tebygol o geisio mynd adref ar ben eu hunain.
Hefyd yn rhan o'r ymgyrch bydd deunydd i addysgu bechgyn a rhieni am gam-drin rhywiol.
Bydd ffilm fer yn cael ei chreu fydd yn "rhoi'r bai ar y troseddwyr," yn ôl yr heddlu.
Cafodd yr ymgyrch ei ddyfeisio gan Heddlu Northumbria ddwy flynedd yn ôl.
Fe wnaeth Heddlu Northumbria dreialu'r ymgyrch yn ninas Newcastle. Yn dilyn y prawf, fe adroddon nhw gwymp o 30% mewn ymosodiadau rhyw difrifol.
Yn ôl Prif Arolygydd Heddlu Northumbria, Stephen Wykes, mae'r ffigyrau'n awgrymu fod yr ymgyrch yn effeithiol.
'Eisiau i bobl gallu mwynhau'n ddiogel'
"Mae nifer pryderus o ymosodiadau rhywiol wedi cael eu hadrodd dros y blynyddoedd diweddar," meddai Mr Dunbobbin, sydd wedi "effeithio ar hyder merched wrth fynd allan ar ben eu hunain."
Fis Hydref, cafodd protestiadau am ddiogelwch merched eu sbarduno gan nifer o adroddiadau o ferched yn cael eu sbeicio gyda'r nos, gan gynnwys honiadau o sbeicio drwy nodwydd.
"Rydyn ni am i bobl fedru mwynhau mewn ffordd cyfrifol a, mwy na dim, i fedru cyrraedd adref yn ddiogel," meddai Mr Dunbobbin.
"Rydyn ni'n credu gall cael mwy o lygaid ar y strydoedd wneud gwahaniaeth."
Fis diwethaf fe wnaeth Mr Dunbobbin lansio Ymgyrch Strydoedd mwy Diogel yn Wrecsam, sydd yn anelu at leihau'r nifer o achosion o drais yn erbyn merched gan 10%.
Pynciau cysylltiedig
Straeon perthnasol
- Cyhoeddwyd24 Hydref 2021
- Cyhoeddwyd22 Hydref 2021
- Cyhoeddwyd21 Hydref 2021