Wcráin: 'Angen gwneud mwy i atal ymddygiad ymosodol Rwsia'

Dywedodd Liliia (dde) - yma gyda'i chwaer Gulzara - fod y sefyllfa yn Wcráin "yn gwaethygu trwy'r amser"

Mae mam o Wcráin sydd newydd ffoi i Gymru'n galw am wneud mwy i atal ymddygiad ymosodol Rwsia yn ei mamwlad.

Tan yr wythnos diwethaf, roedd Liliia yn byw gyda'i gŵr a'u mab pedair oed, Jamil, yn Kyiv.

Ar ôl dwy noson o fomio'r brifddinas, fe benderfynodd y pâr y byddai'n fwy diogel i Liliia a Jamil ddod i aros yng ngogledd Cymru gyda'i chwaer, Gulzara.

Wrth sgwrsio dros baned a chacen gri yng nghegin Gulzara, fe ddywedodd Liliia ei bod hi'n teimlo'n "ddiogel" erbyn hyn.

'Mae'n ofnadwy, yn erchyll'

Gyda'i chwaer yn cyfieithu, dywedodd Liliia bod y sefyllfa yn Wcráin "yn gwaethygu trwy'r amser".

"Mae angen i chi weithredu. Mae angen i chi wneud rhywbeth i stopio'r ymddygiad ymosodol yma," meddai.

"Bydd pobl Wcráin yn gwneud eu gorau, ond mae pobl gyffredin yn marw yn y rhyfel hwn yn ogystal â phlant. Mae'n ofnadwy, yn erchyll."

Mae dros filiwn o bobl wedi ffoi o Wcráin ers dechrau'r gwrthdaro yr wythnos ddiwethaf

Yn gynharach yr wythnos hon, fe deithiodd Gulzara a'i gŵr Dylan Jones i Romania, ger y ffin ag Wcráin, i gwrdd â Liliia a'i mab.

Fe lanion nhw ym maes awyr Luton ddydd Mercher.

"Dwi'n medru ymlacio ychydig," medd Liliia. "Dwi'n dawelach fy meddwl, yn teimlo'n ddiogel."

• 'Nonsens sôn am fisas pan fo cymaint yn ffoi'

• Wcráin: Diogelwch wedi'r ddihangfa - ond ble nesaf?

Yn ôl Dylan, nos Fercher oedd y tro cyntaf iddo ef a'i wraig, Gulzara, gysgu'n iawn ers wythnos.

"Yn y dechrau roedd o fel bod ni'n gwylio rhyw horror movie yn datblygu ar y sgrîn," dywedodd.

"Gweld llefydd 'den ni wedi hen arfer efo nhw, strydoedd efo tancia' a soldiwrs ar strydoedd reit gyfarwydd i ni.

"Pan gafon ni'r alwad gan Liliia, roedd o bron yn rhyddhad, roedd gennym ni rywbeth i ganolbwyntio arno. Ond wrth gwrs roedd 'na lot o stress o orfod trefnu popeth."

Hyd yn oed ar ôl cwrdd â Liliia yn Romania, doedd dim sicrwydd a fyddai hi'n cael mynediad i Brydain.

"Fe ddywedodd ffrind da wrtha i 'Jyst cer amdani'," meddai Dylan.

"A dyna be aru ni wneud, mynd i'r airport. Yr unig beth oedd gynno ni oedd screenshot o wefan Llywodraeth Prydain yn deud bod perthnasau i bobl efo fisa fel Gulzara yn cael dod i fewn.

"Aru'r dadlau fynd ymlaen am hir ond yn y diwedd nethon nhw adael i ni fflio i Luton."

'Eisiau dweud diolch o galon i bawb'

Mae ei wraig, Gulzara, hefyd yn teimlo "rhyddhad".

Dywedodd: "Dwi wedi blino'n ofnadwy, ond dwi'n teimlo rhyddhad mawr achos mae fy chwarae a fy nai gyda ni.

"Dwi isio dweud diolch o galon i bawb. Fydden ni byth wedi ei wneud o heb eich cefnogaeth a'ch cariad. 'Dech chi wedi dangos sut mae cymdeithas ddemocrataidd yn gweithio, lle mae gwleidyddion yn gwrando ar y bobl, nid fel arall.

"Dyma beth mae pobl Wcráin yn breuddwydio ei adeiladu yn ein gwlad.

"Dwi isio anghofio'r saith diwrnod diwethaf achos mae'n nightmare. Dwi isio deffro yn y bore a gweld fy nightmare yn gorffen."

• Cynnal sawl digwyddiad ledled Cymru i gefnogi Wcráin

• Wcráin: 'Ni a nhw'n sefyll gyda'n gilydd mewn gobaith'

Yn ôl Liliia, mae ei mab bach Jamil yn meddwl ei fod ar wyliau.

"Mae'n gofyn 'Ble 'den ni'n mynd nesaf? Pwy 'den ni'n mynd i weld heddiw?'" meddai Liliia.

"Ond yn anffodus, mae o wedi dysgu geiriau fel 'rhyfel', 'bom', 'bomio', 'seiren'."

Mae gŵr Liliia mewn rhan fwy diogel o Wcráin, a'r teulu'n falch o fod gyda'i gilydd yng ngogledd Cymru wedi wythnosau hunllefus.