Ailystyried hyd dedfryd dyn a laddodd dau o blant ar yr M4

Bu farw Jayden ddyddiau ar ôl ei chwaer fawr Gracie, wedi i'r ddau gael anafiadau difrifol yn y gwrthdrawiad

Bydd dedfryd dyn a laddodd dau blentyn ifanc o Dredegar mewn gwrthdrawiad ar yr M4 ar gyrion Casnewydd yn cael ei hystyried i asesu a oedd yn ddigon llym.

Bu farw Gracie Ann Lucas, pedair, a'i brawd tair oed, Jayden Lee Lucas, o'u hanafiadau yn yr ysbyty yn dilyn gwrthdrawiad ar 5 Chwefror eleni.

Cafodd eu mam, Rhiannon Lucas anafiadau difrifol hefyd wedi i fan Ford Transit Martin Newman daro Ford Fiesta'r teulu wrth iddyn nhw deithio adref o barti pen-blwydd.

Fe gafodd Newman, 41, ei ddedfrydu ar 8 Ebrill i naw mlynedd a phedwar mis o garchar ar ôl pledio'n euog yn Llys Y Goron Caerdydd i ddau gyhuddiad o achosi marwolaeth trwy yrru'n beryglus.

• M4: Teyrnged i ferch bedair oed 'hyfryd' fu farw

• M4: Enwi bachgen, 3, fu farw ddyddiau ar ôl ei chwaer

Clywodd y llys bod Newman yn credu iddo syrthio i gysgu "am eiliad" cyn y gwrthdrawiad

Clywodd y llys bod Newman wedi yfed gwin coch wrth yrru a bod cocên yn ei system pan wyrodd ei fan i gar y teulu Lucas, oedd wedi tynnu i mewn i'r llain galed.

Dywedodd llefarydd ar ran Swyddfa'r Twrnai Cyffredinol, Suella Braverman, ddydd Mawrth: "Rydym wedi derbyn cais i ystyried y ddedfryd yma dan y cynllun ULS (Unduly Lenient Sentence).

"Mae gan Swyddogion y Gyfraith 28 diwrnod o'r ddedfryd i ystyried yr achos a gwneud penderfyniad."

Mae hawl gan unrhyw un i ofyn am adolygiad, a does dim rhaid iddyn nhw fod wedi bod yn rhan o'r achos.