'Dylid defnyddio Cymru, nid Wales yn rhyngwladol' - Plaid

Chwaraewyr Cymru yn dathlu cyrraedd Cwpan y Byd am y tro cyntaf ers 1958

Dylai Llywodraeth Cymru "arddel defnyddio Cymru yn hytrach na Wales yn rhyngwladol", medd Plaid Cymru.

Byddai "rhoi 'Cymru' wrth galon" strategaeth newydd yn helpu i "hyrwyddo twristiaeth gynaliadwy", meddai Luke Fletcher AS ar ran y blaid.

Gwnaed yr alwad yng nghyswllt Strategaeth Ddigwyddiadau Genedlaethol Cymru 2022 i 2030 Llywodraeth Cymru.

Un o themâu allweddol y strategaeth yw y "bydd gan ddigwyddiadau yng Nghymru 'Gymreictod' penodol, ni waeth beth fo'u maint, eu graddfa na'u lleoliad. Bydd hyn yn cynnwys y Gymraeg, yn adlewyrchu Brand Cymru Wales, a meini prawf y Ddeddf Llesiant".

Dywedodd llefarydd ar ran Llywodraeth Cymru: "Rydym yn falch o ddefnyddio Cymru a Wales, oherwydd mae'r ddau yn perthyn i bob un ohonom."

'Diolch'

Mae Cymdeithas Bêl-droed Cymru wedi gosod cynsail wrth ddefnyddio Cymru yn hytrach na Wales.

Dywedodd Rob Dowling, pennaeth cynnwys ac ymgysylltu'r gymdeithas, wrth y BBC bod eu defnydd o eiriau yn Gymraeg yn unig wedi cynyddu, "mewn ffordd gynhwysol a hygyrch", yn ystod ymgyrch eiconig Euro 2016 a bod hynny "wedi helpu i'n gwahaniaethu oddi wrth wledydd eraill".

Ar ôl cyrraedd y rowndiau terfynol yn Ffrainc, argraffwyd 'Diolch' ar grysau "gan wybod y byddai'r delweddau hynny yn cael eu dangos trwy'r byd", meddai.

Chwaraewyr Cymru yn gwisgo crysau yn dweud diolch yn Gymraeg a Ffrangeg yn Euro 2016

'Hyderus'

Yn 2017, meddai Mr Dowling, gwnaed "y penderfyniad ymwybodol i ddefnyddio Cymru yn lle Wales, a oedd yn ddilyniant naturiol".

"Cafwyd cwynion yn awr ac yn y man, ond roeddem yn teimlo bod angen i ni fod yn hyderus wrth ei ddefnyddio. Mae'r rhan fwyaf o bobl ledled y DU yn deall y gair.

"Nawr mae cefnogwyr weithiau yn llafarganu Cymru nid Wales, yn enwedig pan rydyn ni'n chwarae yn Llanelli."

• Llwyfan newydd i'r Gymraeg diolch i sylw byd-eang

Eglurodd trwy enwi adrannau Cymru Premier, Cymru South, Cymru North ac ati, ei bod yn "gorfodi'r cyfryngau i'w ddefnyddio".

"A pham lai - maen nhw'n defnyddio La Liga, Bundesliga ac ati."

Mae Noel Mooney, prif weithredwr Cymdeithas Bêl-droed Cymru, yn gyson yn defnyddio 'Cymru' ar lafar

Mantais arall o ddefnyddio Cymru yn hytrach na Wales, meddai Rob Dowling yw trefn yr wyddor - "ar albyms sticer fe fydden ni tuag at y blaen nid y cefn, ac yng nghyfarfodydd FIFA bydden ni'n cael seddi yn nes at y blaen".

Dywedodd bod y gymdeithas yn ddiolchgar i'r arbenigwr ar gyfryngau cymdeithasol, Owen Williams, am roi'r ddolen Twitter @Cymru iddynt.

Defnyddiodd y gymdeithas y ddolen honno am y tro cyntaf yn Ionawr 2018 i gyhoeddi penodiad Ryan Giggs fel rheolwr newydd Cymru.

"Gallaf weld, yn seiliedig ar ein profiad ni, sut y gallai'r wlad elwa o ddefnyddio Cymru yn lle Wales", meddai Mr Dowling.

Mae Cymdeithas Bêl-droed Cymru wedi cyhoeddi Gŵyl Cymru, gŵyl 10 diwrnod i ddod â chymunedau ynghyd wrth gefnogi Cymru yn ystod eu hymgyrch Cwpan y Byd

Wrth arwain dadl yn y Senedd, cyflwynodd y Ceidwadwyr Cymreig gynnig bod "digwyddiadau mawr yn helpu i roi hwb i swyddi a'r economi drwy arddangos Cymru i'r byd", ond maen nhw'n "gresynu at y ffaith bod Llywodraeth Cymru'n dangos diffyg uchelgais wrth ddod â'r cyfleoedd hyn i Gymru".

Roedd y Ceidwadwyr yn galw ar Lywodraeth Cymru i "ailystyried y strategaeth gan ganolbwyntio ar ddyhead, creadigrwydd ac arloesedd wrth ddenu digwyddiadau mawr i Gymru".

Yn ogystal â galw am ddefnyddio Cymru yn hytrach na Wales yn rhyngwladol, roedd gwelliant Plaid Cymru hefyd yn galw ar Lywodraeth Cymru "i sicrhau y caiff diwylliant a threftadaeth Cymru a'r Gymraeg eu hymwreiddio'n bellach yn y strategaeth, gan gynnwys digwyddiadau mawr cynhenid fel yr Eisteddfod Genedlaethol".

Cafodd cynnig y Ceidwadwyr ei wrthod o 14 pleidlais i 38, a gwelliant Plaid Cymru ei wrthod o 26 pleidlais i 27.

Dywed Gweinidog yr Economi Vaughan Gething bod Cymru yn wlad "a all gynnal digwyddiadau o'r radd flaenaf, gan gystadlu'n effeithiol â goreuon y byd".