'Fanzone' Cwpan y Byd Y Trallwng i fod yn hafan gynnes

Fanzone 2016

Roedd golygfeydd cofiadwy o 'fanzones' Cymru yn ystod Euro 2016

Gan Dafydd Evans
Gohebydd BBC Cymru

Mae paratoadau ar y gweill ym Mhowys i greu ardal wylio arbennig i gefnogwyr gyda llai na mis tan gêm gyntaf Cymru yng Nghwpan y Byd.

Roedd golygfeydd cofiadwy o fanzones Cymru yn ystod Euro 2016.

Efallai na fydd yr un golygfeydd i'w gweld yn nhywydd hydrefol mis Tachwedd eleni, ond yn Y Trallwng y gobaith ydy y bydd y fanzone yn neuadd y dref hefyd yn gweithredu fel hafan gynnes i drigolion.

O hanner tymor ymlaen bydd y cyhoedd yn cael eu gwahodd i'r neuadd bob dydd, ac ar achlysur gemau Cymru yn Qatar bydd sgrin fawr yn dangos y pêl-droed.

Dywedodd un o'r rhai tu ôl i'r syniad, y Cynghorydd Ben Gwalchmai wrth Newyddion S4C: "Dydyn ni ddim eisiau cymryd oddi ar y tafarndai achos ni'n gwybod bod hynny'n bwysig.

"Ond os ydy teuluoedd eisiau rhywle arall gallan nhw ddod i'r neuadd.

"Maen nhw'n gwybod ei fod yn lle diogel, yn neis a chynnes - fel yr ysbryd cymunedol."

'Dod â'r gymuned yn agosach'

Mae neuadd y dref Y Trallwng yn hen adeilad sydd angen ei wresogi'n barhaus.

Oherwydd hynny mae'r Cyngor Tref yn gwahodd pobl i mewn dros fisoedd oer y gaeaf i gadw'n gynnes ac i rannu cwmni.

Dywed y Cynghorydd Ben Gwalchmai fod neuadd y dref "yn lle diogel, yn neis a chynnes"

"Fel Cyngor Tref ni'n gwybod mae'n gaeaf anodd. Mae ddim yn edrych fel gaeaf neis," meddai'r Cynghorydd Gwalchmai.

"Ond ni'n hapus i wneud popeth posib dros y dref ac yma yn y neuadd."

Bydd y gwahoddiad i bawb, ond yn enwedig teuluoedd.

Un sy'n rhoi croeso i'r syniad ydy pennaeth Ysgol Gymraeg Y Trallwng, Angharad Davies.

Angharad Davies: "Fydd 'Yma o Hyd' yn adleisio yn y dyffryn yma a fydd o'n wych!"

"Yn anffodus mae hi'n gyfnod heriol iawn ar nifer o deuluoedd yr ardal, a thu hwnt hefyd," meddai.

"Dwi'n meddwl bod y ffaith bod nhw'n cymryd hynny mewn i ystyriaeth, mae o mor bwysig. Mae o jyst yn dod â'r gymuned yn agosach at ei gilydd."

Mae'r pêl-droed yn fonws i Ms Davies, sy'n bêl-droediwr brwd ei hun.

"Mae o yma i danio Cymreictod, felly fydd y plant 'ma'n gallu canu nerth eu pennau," meddai.

"Fydd 'Yma o Hyd' yn adleisio yn y dyffryn yma a fydd o'n wych!"

Mae Kieran, Libby a Morgan yn edrych ymlaen at wylio Cymru yng Nghwpan y Byd

Mae'r plant hefyd yn edrych ymlaen yn fawr.

Dywedodd Kieran: "Mae'n dod â pobl at ei gilydd. Oherwydd costau bywyd, dydy rhai pobl ddim yn gallu gwylio fo."

Mae Libby yn dawel hyderus am obeithion Cymru yng Nghwpan y Byd: "Dwi'n barod i wylio. Dwi'n meddwl bod hefo nhw siawns da. Ond bydd 'na dimau anodd hefyd."

Mae Morgan yn cyfri'r dyddiau: "Dwi'n mynd mor gyffrous pob diwrnod. Dwi'n codi a dwi fel 'dyna ddiwrnod i lawr tan Cwpan y Byd'. Dwi mor falch ac angerddol."

Mae "unrhyw beth sy'n hybu Cymreictod" yn hwb i'r dref, medd Avril Hughes

Yn siop Gymraeg Pethe Powys mae Avril Hughes hefyd yn gobeithio y bydd llwyddiant i'r tîm cenedlaethol yn hwb i Gymreictod yn dref ar y ffin, fel yn 2016.

"Dwi'n gwybod roedd ganddom ni yr het bwced enwog yma ar werth ac roedd honno wedi diflannu o'r silffoedd yn gyflym iawn a phawb yn awyddus i gael un," meddai.

"So ydy mae o yn hwb - unrhyw beth sy'n hybu Cymreictod - a dwi'n credu mae'r tîm yn pêl-droed yn llwyddo i wneud hynny."

Efallai o ddiddordeb:

Gareth Bale yn sgorio'n fyw ar Newyddion 9

Pynciau cysylltiedig

Straeon perthnasol