Hetiau enfys i gael eu caniatáu yng ngêm Cymru v Iran

Mae Cymdeithas Bêl-droed Cymru wedi cael ei sicrhau y bydd hetiau bwced enfys yn cael eu caniatáu yng ngêm Cymru yn erbyn Iran.

Fe ysgrifennodd FIFA at gorff llywodraethu pêl-droed Cymru yn addo hynny yn ôl y prif weithredwr, Noel Mooney.

Fe gafodd staff yn y stadiwm eu cyhuddo o beidio a pharchu cefnogwyr LHDTC+ cyn gêm gyntaf Cymru'n erbyn UDA nos Lun, gan ofyn iddyn nhw dynnu eu hetiau lliwgar.

Dywedodd yr Athro Laura McAllister, sy'n gyn-gapten ar dîm pêl-droed merched Cymru, iddi gael ei thrin yn "llawdrwm" pan ofynnodd staff iddi dynnu ei het.

Cyn y gêm yn erbyn Iran fore Gwener, dywedodd bod y tro pedol yn "fuddugoliaeth".

Cafodd Laura McAllister ei holi gan swyddogion diogelwch yn y stadiwm am ei het enfys

Wrth siarad cyn gêm Cymru'n erbyn Iran fore Gwener, fe rybuddiodd Mr Mooney bod yn rhaid i'r cadarnhad gael ei gymryd "yn arwynebol".

Ychwanegodd: "Fe wnaethon ni ysgrifennu at FIFA gan ofyn am sicrwydd ac fe gafon ein sicrhau bod y stadiwm yn cydymffurfio.

"Mae'n rhaid i ni ei gymryd yn arwynebol na chaiff unrhyw un broblem yfory [ddydd Gwener].

"Os y bydd gofyn i unrhyw un dynnu eu hetiau yfory, fe wnawn ni ei ddwysáu [y mater].

Mae'r rhwymyn lliwgar yn rhan o ymgyrch i hybu amrywiaeth a chynhwysiad

Fe ddaeth cadarnhad fore Llun na fyddai capten Cymru, Gareth Bale, yn gwisgo rhwymyn braich OneLove yng Nghwpan y Byd wedi'r cwbl.

Roedd Cymru yn un o saith gwlad oedd yn bwriadu gwisgo'r rhwymyn - sy'n rhan o ymgyrch i hybu amrywiaeth a chynhwysiad - a ddechreuodd cyn Euro 2020.

Ond dywedodd FIFA y byddai'n cosbi unrhyw chwaraewr neu wlad oedd yn defnyddio'r rhwymyn.

'Crac'

Wrth edrych yn ôl ar yr hyn ddigwyddodd cyn gêm UDA, dywedodd Mr Mooney ei fod "yn dal yn hynod o grac".

"Mae ein chwaraewyr yn byw eu bywydau'n breuddwydio am chwarae yng Nghwpan y Byd a chynhwysiant yw popeth yng Nghwpan y Byd.

"Roedd cymryd hynny oddi wrthom ar fore'r gêm yn gwbl afresymol i ni, ry'n ni'n dal i ddod dros hynny."

Fe wnaeth Mr Mooney wrthod yr awgrym fod y gymdeithas bêl-droed wedi ildio, gan ddweud eu bod am i'r chwaraewyr "gadw eu ffocws" ar y gêm.

Dywedodd y byddai'r gymdeithas wedi derbyn sancsiynau neu ddirwyon, ond ychwanegodd: "I siarad am gardiau melyn, cardiau coch, tynnu pwyntiau neu i'w roi ar y chwaraewyr, mae hynny oddi ar y Raddfa Richter i ni."

Mae Noel Mooney yn gobeithio y bydd pwysau ar chwaraewyr yn cael eu lleddfu cyn gêm Iran

Wrth edrych tuag at y gêm yn erbyn Iran ddydd Gwener, dywedodd bod y gemdeithas yn gobeithio "tawelu pethau" a lleddfu'r pwysau oedd ar y chwaraewyr.

Gyda sicrwydd na fydd problemau ar gyfer cefnogwyr, dywedodd eu bod yn "ceisio bod yn bositif nawr".

"Ry'n ni wedi cyrraedd llwyfan y byd ond mae'r diwrnodau diwethaf wedi bod yn anodd," dywedodd.

"Dydy hi ddim wedi teimlo fel y Cwpan y Byd cynnes, cynhwysol fel gafodd ei addo.

'Ddim yn falch o'r dyddiau diwethaf'

Dywedodd Mr Mooney ei fod yn dymuno gweld "FIFA iach a chryf" a bod angen "adeiladu unrhyw bartneriaeth ar ymddiriedaeth".

"Mae wir yn ein poeni ni am y cyfeiriad sydd wedi ei gymryd, dy'n ni ddim yn falch o'r dyddiau diwethaf.

"Ond ry'n ni i gyd yn gefnogwyr pêl-droed ac eisiau i FIFA fod yn wych."

Wrth ymateb i'r drafodaeth gan rai cefnogwyr ddydd Llun am gymryd camau cyfreithiol, dywedodd Mr Mooney: "Dwi ddim wir yn siŵr y gallen ni wneud unrhyw beth cyfreithiol."

• Cwpan y Byd 2022: Rhoi Cymru ar lwyfan y byd yn Doha

• Y Gymraeg i'w chlywed yng Nghwpan y Byd am y tro cyntaf

• Pam fod Cwpan y Byd 2022 mor ddadleuol?

• Pryd mae gemau Cwpan y Byd Cymru?

• Bale: 'Mwy yn gwybod am hanes Cymru nawr'

• BBC Bitesize: Gweithgareddau Cwpan y Byd